Tattha sataṃ dhammaṃ anussaranti samma saccametaṃ, ahaṃ sukhaṃ jīvitarūpo raṭṭhato vivanamāgato, sohaṃ ekakova imasmiṃ araññe rukkhamūle nisīditvā kapaṇo viya jhāyāmi, yaṃ vacanaṃ vadesi kinnāmetaṃ cintesīti taṃ te vadāmi. Sataṃ dhammanti ahaṃ hi sataṃ dhammaṃ anussaranto idha nisinno. Sataṃ dhammanti buddhapaccekabuddhasāvakānaṃ sataṃ sappurisānaṃ paṇḍitānaṃ dhammaṃ lābho alābho yaso ayaso nindā pasaṃsā sukhaṃ dukkhanti ayaṃ hi aṭṭhavidho lokadhammo, iminā pana abbhāhatā santo na kampenti na vedhenti ayamettha akampanasaṅkhāto sataṃ Dhammo, iti imaṃ dhammaṃ anussaranto nisinnomhīti dīpeti.

Atha naṃ sakko evaṃ sante brāhmaṇa imasmiṃ ṭhāne kasmā nisinnosīti. Rājā caturaṅgasamannāgataṃ uyyānapālaṃ āharāpesi, tādisaṃ na sakkomi laddhuṃ, sohaṃ kiṃ me parassa hatthamaraṇena, araññaṃ pavisitvā anāthamaraṇaṃ marissāmīti cintetvā idha āgantvā nisinnomhīti. Brāhmaṇa ahaṃ sakko devarājā mayā te uyyānādīni māpitāni, caturaṅgasamannāgataṃ uyyānapālaṃ māpetuṃ na sakkomi, tumhākaṃ rañño sīsapasādhanakappako chattapāṇī nāma caturaṅgasamannāgato, uyyānapālena atthe sati, etaṃ kappakaṃ uyyānapālaṃ kātuṃ vadehīti. Iti sakko bodhisattassa ovādaṃ datvā mā bhāyīti samassāsetvā attano devapurameva gato. Bodhisatto gehaṃ gantvā bhuttapātarāso rājadvāraṃ gantvā chattapāṇimpi tattheva disvā taṃ hatthe gahetvā tvaṃ kira samma chattapāṇi caturaṅgasamannāgatosīti pucchitvā ko te mayhaṃ caturaṅgasamannāgatabhāvaṃ ācikkhīti vutte sakko devarājāti vatvā kiṃkāraṇā ācikkhīti vutte iminā kāraṇena ācikkhīti sabbaṃ ācikkhi. So āma ahaṃ caturaṅgasamannāgatoti āha. Atha naṃ bodhisatto hatthe gahetvā rañño santikaṃ gantvā ayaṃ mahārāja chattapāṇī caturaṅgasamannāgato, uyyānapālena atthe sati, imaṃ uyyānapālaṃ karothāti āha. Atha naṃ rājā tvaṃ kira caturaṅgasamannāgatosīti pucchi. Āma mahārājāti. Katamehi caturaṅgehi samannāgatosīti.