baddhāpi tattha muccanti yattha dhīrā ca bhāsareti, imasmiṃ jātake āgatanayeneva ekasmiṃ kāle ayaṃ chattapāṇi rājā hutvā catusaṭṭhiyā pādamūlikehi saddhiṃ padussitvā bodhisattaṃ attano manorathaṃ apūrentaṃ nāsetukāmāya deviyā paribhinno bandhāpesi. Tadā bandhitvā ānīto bodhisatto yathābhūtaṃ deviyā dosaṃ ārocetvā sayaṃ mutto raññā bandhāpite sabbepi te pādamūlike mocāpetvā etesañca deviyā ca aparādhaṃ khamatha mahārājāti ovadati. Sabbaṃ heṭṭhāvuttanayeneva vitthārato veditabbaṃ. Taṃ sandhāyāha

Itthiyā kāraṇā rāja bandhāpesiṃ purohitaṃ,

so maṃ atthe nivesesi, tasmāhaṃ anussuyyakoti.

Tadā pana so cintesi ahaṃ soḷasasahassā itthiyo pahāya etaṃ ekameva kilesavasena saṅgaṇhantopi taṃ santappetuṃ nāsakkhiṃ, evaṃ duppūraṇīyānaṃ itthīnaṃ kujjhanaṃ nāma, nivatthavatthe kilissante kasmā kilissatīti kujjhanasadisaṃ hoti, bhuttabhatte gūthabhāvaṃ āpajjante kasmā etaṃ gūthabhāvaṃ āpajjatīti kujjhanasadisaṃ viya ca hoti, itodāni paṭṭhāya yāva arahattaṃ na pāpuṇāmi tāva kilesaṃ nissāya mayhaṃ ussuyyā mā uppajjatūti adhiṭṭhahiṃ. Tato paṭṭhāya anussuyyako jāto. Idaṃ sandhāya tasmāhaṃ anussuyyakoti āha.