yo ca vantakasāvassa sīlesu susamāhito

upeto damasaccena sa ve kāsāvamarahatīti.

Tattha anikkasāvoti kasāvo vuccati rāgo doso moho makkho palāso issā macchariyaṃ māyā sātheyyaṃ thambho sārambho māno atimāno mado pamādo sabbe akusalā dhammā sabbe duccaritā sabbaṃ bhavagāmikammaṃ diyaḍḍhakilesasahassaṃ, eso kasāvo nāma. So yassa puggalassa appahīno santānato nissito anikkhanto so anikkasāvo nāma. Kāsāvanti kāsāyarasapītaṃ arahattaddhajabhūtaṃ. Yo vatthaṃ paridahissatīti yo evarūpo hutvā evarūpaṃ vatthaṃ paridahessati nivāseti ceva pārupati ca. Apeto

Damasaccenāti indriyadamasaṅkhātena damena nibbānasaṅkhātena ca paramatthasaccena apeto parivajjito. Nissakkatthe vā karaṇavacanaṃ. Etasmā damasaccā apetoti attho. Saccanti cettha catusaccampi vattati yeva. Na so kāsāvamarahatīti so puggalo anikkasāvattā arahattaddhajaṃ kāsāvaṃ na arahati, ananucchaviko etassa. Yo ca vantakasāvassāti yo pana puggalo yathāvuttasseva kāsāvassa vantattā vantakasāvo assa. Sīlesu susamāhitoti maggasīlesu ceva phalasīlesu ca sammā āhito ānetvā ṭhapito viya tesu patiṭṭhito. Tehi sīlehi samaṅgībhūtassetaṃ adhivacanaṃ. Upetoti sampanno samannāgato. Damasaccenāti vuttappakārena damena ceva saccena ca. Sa ve kāsāvamarahatīti eso evarūpo puggalo imaṃ arahattaddhajaṃ kāsāvaṃ arahati.