Tattha name namantassa bhaje bhajantanti yo attano namati tasseva paṭinameyya, yo ca bhajati taññeva bhajeyya. Kiccānukubbassa kareyya kiccanti attano uppannaṃ kiccaṃ anukubbantasseva tassāpi uppannakiccaṃ paṭikareyya. Caje cajantaṃ, vanathaṃ na kayirāti attānaṃ jahantaṃ jahetheva, kiñci tasmiṃ taṇhāsaṅkhātaṃ vanathaṃ na kareyya. Apetacittenāti vigatacittena vipallaṭṭhacittena. Na sambhajeyyāti tathārūpena saddhiṃ na samāgaccheyya. Dijo dumanti yathā sakuṇo pubbe phalitampi rukkhaṃ phale khīṇe khīṇaphalo ayanti ñatvā taṃ chaḍḍetvā aññaṃ samekkhati pariyesati evaṃ aññaṃ samekkheyya, mahā hi esa loko, avassaṃ tumhesu sasnehaṃ ekaṃ purisaṃ labhissathāti.

Taṃ sutvā bārāṇasirājā deviyā sabbissariyaṃ adāsi. Tato paṭṭhāya samaggā sammodamānā vasiṃsu.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi. Saccapariyosāne dve jāyapatikā sotāpattiphale patiṭṭhahiṃsu. Tadā jāyapatikā imeva dve jāyapatikā ahesuṃ, paṇḍitāmacco pana ahamevāti.

Puṭabhattajātakaṃ tatiyaṃ.