Tattha aṭṭhitaṃ me manasmiṃ meti yaṃ tumhe kathetha, taṃ mayā manasmiṃ adhiṭṭhitameva manasmiṃ yeva me etaṃ adhiṭṭhitanti. Atho me hadaye katanti atha pana me tumhākampi vacanaṃ hadaye katameva. Kālañca paṭikaṅkhāmīti kālañca paṭimānemi. Yāva pasupatujjanoti yāvāyaṃ mahājano pasupatu niddaṃ okkamatu, tāvāhaṃ kālaṃ paṭimānemi. Itarathā hi ayaṃ sunakho palāyatīti attano manoratho uppajjeyya, tasmā rattibhāge sabbesaṃ suttakāle cammayottaṃ khāditvā palāyissāmīti.

So evaṃ vatvā mahājane niddaṃ okkamante yottaṃ khāditvā suhitova palāyitvā attano sāmikānaṃ gharameva gato.

Satthā imaṃ dhammadesanaṃ āharitvā jātakaṃ samodhānesi. Tadā sunakho etarahi sunakhova, paṇḍitapuriso pana ahamevāti.

Sunakhajātakaṃ dutiyaṃ.