ahaṃ taṃ saraṇaṃ samma, ahamācariyapūjako,

na taṃ jayissati sisso, sissamācariya jessasīti.

Tattha ahaṃ taṃ saraṇanti ahaṃ saraṇaṃ avassayo patiṭṭhā hutvā taṃ tāyissāmi. Sammāti piyavacanametaṃ. Sissamācariya jessasīti ācariya tvaṃ vīṇaṃ vādayamāno sissaṃ janissasi.

Api ca taṃ vīṇaṃ vādento ekaṃ tantiṃ chinditvā cha vādeyyāsi, vīṇā te pakatisaddo bhavissati, musilopi tantiṃ chindissati, athassa vīṇāya saddo na bhavissati, tasmiṃ khaṇe so parājayaṃ pāpuṇissati, athassa parājayabhāvaṃ ñatvā dutiyampi tatiyampi catutthampi pañcamampi chaṭṭhampi sattamampi tantiṃ chinditvā suddhadaṇḍakameva vādeyyāsi, chinnatantikoṭīhi saro nikkhamitvā sakalaṃ dvādasayojanikaṃ bārāṇasinagaraṃ chādetvā ṭhassatīti. Evaṃ vatvā sakko bodhisattassa tisso pāsakaghaṭikā datvā evamāha vīṇāsaddena pana sakalanagare chādite ito ekaṃ pāsakaghaṭikaṃ ākāse khipeyyāsi, atha te purato otaritvā tīṇi accharāsatāni naccissanti, tāsaṃ naccakāle dutiyaṃ khipeyyāsi, athāparāni tīṇi accharāsatāni otaritvā tava vīṇāya purato naccissanti, tato tatiyampi khipeyyāsi, athāparāni tīṇi accharāsatāni otaritvā raṅgamaṇḍale naccissanti, ahampi te santikaṃ āgamissāmi, gaccha mā bhāyīti. Bodhisatto pubbaṇhasamaye Gehaṃ agamāsi. Nāgarā rājadvārasamīpepi maṇḍapaṃ katvā rañño āsanaṃ paññāpesuṃ. Rājā pāsādā otaritvā alaṅkatamaṇḍape pallaṅkamajjhe nisīdi. Dasasahassā alaṅkatitthiyo amaccabrāhmaṇa- raṭṭhikādayo ca rājānaṃ parivārayiṃsu. Sabbe nāgarā sannipatiṃsu. Rājaṅgaṇe cakkāticakke mañcātimañce bandhiṃsu. Bodhisattopi nahātānulitto nānaggarasabhojanaṃ bhuñjitvā vīṇaṃ gāhāpetvā attano paññattāsane nisīdi. Sakko adissamānakāyena āgantvā ākāse aṭṭhāsi. Bodhisatto yeva naṃ passati. Musilopi āgantvā attano āsane nisīdi. Mahājano parivāresi. Ādito va dvepi samasamaṃ vādayiṃsu. Mahājano dvinnampi vāditena tuṭṭho ukkuṭṭhisahassāni pavattesi. Sakko ākāse ṭhatvā bodhisattaññeva sāvento ekaṃ tantiṃ chindāti āha. Bodhisatto paṭhamaṃ tantiṃ chindi. Sā chinnāpi chinnāya koṭiyā saraṃ muñcateva devagandhabbaṃ viya vattati. Musilopi tantiṃ chindi. Tato saddo na nikkhami. Ācariyo dutiyampi tatiyampi catutthampi pañcamampi chaṭṭhampi sattamampi chindi. Suddhadaṇḍakaṃ vādentassa saddo nagaraṃ chādetvā aṭṭhāsi. Celukkhepasahassāni ceva ukkuṭṭhisahassāni ca pavattayiṃsu. Bodhisatto ekaṃ pāsakaṃ ākāse khipi. Tadā tīṇi accharāsatāni otaritvā nacciṃsu. Evaṃ dutiye ca tatiye ca khitte nava accharāsatāni otaritvā vuttanayena nacciṃsu. Tasmiṃ khaṇe rājā mahājanassa iṅgitasañañaṃ adāsi. Mahājano uṭṭhāya tvaṃ ācariyena saddhiṃ Virujjhitvā samākāraṃ karomīti vāyamasi attano pamāṇaṃ na jānāsīti musilaṃ tajjetvā gahitagahiteheva pāsāṇadaṇḍādīhi sañcuṇṇitvā jīvitakkhayaṃ pāpetvā pāde gahetvā saṅkāraṭṭhāne chaḍḍesi. Rājā tuṭṭhacitto ghanavassaṃ vassanto viya bodhisattassa bahudhanaṃ adāsi. Tathā nāgarā. Sakkopi tena saddhiṃ paṭisanthāraṃ katvā ahaṃ te paṇḍita sahassayuttaṃ ājaññarathaṃ gahetvā pacchā mātaliṃ pesessāmi, tvaṃ sahassayuttaṃ vejayantarathaṃ abhiruyha devalokaṃ gaccheyyāsīti vatvā pakkāmi. Atha naṃ gantvā paṇḍukambalasilāyaṃ nisinnaṃ kahaṃ gatattha mahārājāti devadhītaro pucchiṃsu. Sakko tāsaṃ taṃ kāraṇaṃ vitthārena kathetvā bodhisattassa sīlañca guṇañca vaṇṇesi. Devadhītaro mahārāja mayampi ācariyaṃ daṭṭhukāmā, idha naṃ ānehīti āhaṃsu. Sakko mātaliṃ āmantetvā tāta devaccharā guttilagandhabbaṃ daṭṭhukāmā, gaccha taṃ vejayantarathe nisīdāpetvā ānehīti. So sādhūti gantvā bodhisattaṃ ānesi. Sakko bodhisattena saddhiṃ sammoditvā devakaññā kira te ācariya gandhabbaṃ sotukāmāti āha. Mayaṃ mahārāja gandhabbā nāma sippaṃ nissāya jīvāma mūlaṃ labhantā vādeyyāmāti. Vādehi, ahaṃ te mūlaṃ dassāmīti. Na mamaññena mūlena attho, imā pana me devadhītaro attano attano kalyāṇakammaṃ kathentu, evāhaṃ vādessāmīti. Atha naṃ devadhītaro āhaṃsu amhehi katakalyāṇakammaṃ pacchā tumhākaṃ kathessāma,