vaṇṇo ca me sabbadisā pabhāsatīti.

Aparā piṇḍāya caramānassa bhikkhuno pūjanatthāya pupphāni adāsi. Aparāpi cetiye gandhapañcaṅgulikaṃ dethāti gandhe adāsi. Aparā madhurāni phalāni adāsi. Aparā uttamarasaṃ adāsi. Aparā kassapadasabalassa cetiye gandhapañcaṅgulikaṃ adāsi. Aparā maggapaṭipannānaṃ bhikkhūnañca bhikkhunīnañca kulagehe vāsaṃ upagatānaṃ santike dhammaṃ assosi. Aparā nāvāya bhuttassa bhikkhuno udake ṭhatvā udakaṃ adāsi. Aparā agāramajjhe vasamānā akkodhanā hutvā sassusasuravattaṃ akāsi. Aparā attano laddhakoṭṭhāsato saṃvibhāgaṃ katvāva paribhuñji sīlavatī ca ahosi. Aparā paragehe dāsī hutvā nikkodhanā nimmānā attano laddhakoṭṭhāsato saṃvibhāgaṃ katvā devarañño paricārikā hutvā nibbattā. Evaṃ sabbāpi guttilavimānavatthumhi āgatā. Sattatiṃsa devadhītā yaṃ yaṃ kammaṃ katvā tattha nibbattā sabbā bodhisattena pucchitāpissa attano katakammaṃ gāthāhi yeva kathesuṃ. Taṃ sutvā bodhisatto

Lābhā vata me, suladdhaṃ vata me, yvāhaṃ idhāgantvā appamattakenapi kammena paṭiladdhā sampattiyo assosiṃ, itodāni paṭṭhāya manussalokaṃ gantvā dānādīni kusalakammāneva karissāmīti vatvā imaṃ udānaṃ udānesi

svāgataṃ vata me ajja suppabhātaṃ suhuṭṭhitaṃ,