Tattha yaṃ passatīti yaṃ udakādiṃ passati taṃ gaṅgāti na icchati. Yañca na passatīti yañca udakādivinimmuttaṃ gaṅgaṃ na passati, taṃ kira icchati. Maññāmi ciraṃ carissatīti ahaṃ evaṃ maññāmi, ayaṃ paribbājako evarūpaṃ gaṅgaṃ pariyesanto ciraṃ carissati, yathā vā udakādivinimmuttaṃ gaṅgaṃ evaṃ rūpādivinimmuttaṃ attānampi pariyesanto saṃsāre ciraṃ carissati. Na hi taṃ lacchatīti ciraṃ carantopi yaṃ taṃ evarūpaṃ gaṅgaṃ vā attānaṃ vā icchati taṃ na lacchati. Yaṃ labhatīti yaṃ udakādiṃ vā rūpādiṃ vā labhati tena na tussati. Yaṃ pattheti laddhaṃ hīḷetīti evaṃ laddhena atussanto yaṃ yaṃ sampattiṃ pattheti taṃ taṃ labhitvā kiṃ etāyāti hīḷeti avamaññati. Icchā hi anantagorāti yasmā laddhaṃ laddhaṃ hīḷetvā aññaṃ aññaṃ Ārammaṇaṃ icchanato ayaṃ icchā nāma taṇhā anantagocarā. Vigaticchānaṃ namo karomaseti tasmā ye vigaticchā buddhādayo tesaṃ mayaṃ namakāraṃ karomāti.

Satthā imaṃ dhammadesanaṃ āharitvā jātakaṃ samodhānesi. Tadā paribbājako etarahi paribbājako ahosi, tāpaso pana ahamevāti.

Vigaticchajātakaṃ catutthaṃ.