kālo ghasati bhūtāni sabbāneva sahattanā,

yo ca kālaghaso bhūto sa bhūtapacaniṃ pacīti.

Tattha kāloti purebhattakālopi pacchābhattakālopīti evamādi. Bhūtānīti sattādhivacanametaṃ. Na kālo bhūtānaṃ cammamaṃsādīni luñcitvā khādati, api ca kho nesaṃ āyuvaṇṇabalāni khepento yobbanaṃ maddanto ārogyaṃ vināsento ghasati khādatīti vuccati. Evaṃ ghasanto ca na kiñci vajjento sabbāneva ghasati. Na kevalañca bhūtāneva api ca kho sahattanā attānampi ghasati, purebhattakālo pacchābhattakālaṃ na pāpuṇāti. Esa nayo pacchābhattakālādīsu. Yo ca kālaghaso bhūtoti khīṇāsavassetaṃ adhivacanaṃ. So hi ariyamaggena āyatiṃ paṭisandhikālaṃ khepetvā khāditvā ṭhitattā kālaghasoti vuccati. Sa bhūtapacaniṃ pacīti yāyaṃ taṇhā apāyesu bhūte pacati taṃ ñāṇagginā paci dahi bhasmamakāsi. Tena bhūtapacaniṃ pacīti vuccati. Pajanintipi pāṭho. Janitaṃ nibbattitanti attho.

Imaṃ pañhaṃ sutvā māṇavesu ekopi jānituṃ samattho nāhosi. Atha ne bodhisatto mā kho tumhe ayaṃ pañho tīsu vedesu atthīti saññaṃ akarittha, tumhe yamahaṃ jānāmi, taṃ sabbaṃ jānāmāti maññamānā maṃ badararukkhasadisaṃ karotha, mama tumhehi aññātassa bahuno pajānanabhāvaṃ na jānātha, gacchatha, sattame divase kālaṃ Dammi, ettakena kālena imaṃ pañhaṃ cintethāti. Te bodhisattaṃ vanditvā attano attano vasanaṭṭhānaṃ gantvā sattāhaṃ cintetvāpi pañhassa neva antaṃ na koṭiṃ passiṃsu. Te sattame divase ācariyassa santikaṃ āgantvā vanditvā nisīditvā kiṃ bhaddamukhā jānātha pañhanti vutte na jānāmāti vadiṃsu. Puna bodhisatto te garahamāno dutiyaṃ gāthamāha