āvedhañca na passāmi yato ruhiramassave

yāva ayoniso cittaṃ sayaṃ me dukkhamābhatanti.

Tattha saṅkapparāgadhotenāti kāmavitakkasampayuttarāgadhotena. Vitakkanisitena cāti teneva rāgodakena vitakkapāsāṇanisitena. Nevālaṅkatabhadrenāti anālaṅkatena vibhacchenāti attho. Na usukārakatena cāti usukārehipi akatena. Nakaṇṇāyatamuttenāti yāva dakkhiṇakaṇṇacūḷikaṃ ākaḍḍhitvā amuttakena. Na pi morupasevināti morapattagijjhapattādīhi akatupasevanena. Tenamhi hadaye viddhoti tena kilesakaṇḍena hadaye viddho. Sabbaṅgapariḷāhināti. Sabbāni aṅgāni paridahanasamatthena mahārāja tenamhi kilesakaṇḍena hadaye viddho viddhakālato paṭṭhāya mama aggipadittāniva sabbāni aṅgāni dayhantīti dasseti. Āvedhañca na passāmīti viddhaṭṭhānañca na passāmi. Yato ruhiramassaveti yato me āvedhā lohitaṃ pagghareyya taṃ na passāmīti attho. Yāva ayoniso cittanti ettha yāvāti daḷhaṭṭhe nipāto ativiya daḷhaṃ katvā ayoniso cittaṃ viddhanti attho. Sayaṃ me dukkhamābhatanti attanāva mayā attano dukkhaṃ ānītanti.

Evaṃ bodhisatto imāhi tīhi gāthāhi rañño dhammaṃ desetvā rājānaṃ paṇṇasālāto bahi katvā kasiṇaparikammaṃ katvā naṭṭhajjhānaṃ uppādetvā paṇṇasālāya nikkhamitvā ākāse nisinno rājānaṃ ovaditvā mahārāja ahaṃ himavantameva gamissāmīti vatvā na sakkā bhante gantunti vuccamānopi mahārāja mayā idha vasantena evarūpo vippakāro patto idāni na sakkā idheva vasitunti rañño yācantasseva ākāse uppatitvā himavantaṃ gantvā yāvatāyukaṃ ṭhatvā jīvitapariyosāne brahmalokupago ahosi.