Tattha yatthāti yasmiṃ ṭhāne. Posanti sattaṃ. Jātiyā vinayena vāti jātisampanno vā esa na vā ācārayutto vā na vāti evaṃ na jānanti. Mahābrahmeti garukaṃ ālapanaṃ ālapanto āha. Yādisoyanti yādiso ayaṃ. Attānaṃ sandhāya vadati. Jānanto jānamāgammāti ahaṃ attano balaṃ jānanto jānantameva taṃ āgamma paṭicca tava santike kuṇḍakaṃ na bhuñjāmi na hi tvaṃ kuṇḍakaṃ bhojāpetukāmatāya cha sahassāni datvā maṃ gaṇhasīti.
Taṃ sutvā bodhisatto tava vīmaṃsanatthāya taṃ mayā kataṃ mā kujjhīti taṃ samassāsetvā subhojanaṃ bhojetvā ādāya rājaṅgaṇaṃ gantvā ekasmiṃ passe pañca assasatāni katvā ekasmiṃ passe cittasāṇiyā parikkhipitvā heṭṭhā attharakaṃ pattharitvā upari celavitānaṃ bandhitvā sindhavapotakaṃ ṭhapesi. Rājā āgantvā asse olokento ayaṃ asso kasmā visuṃ ṭhapitoti pucchitvā mahārāja ayaṃ sindhavo imesu assesu visuṃ akato mocessatīti sutvā sobhano bho sindhavoti pucchi. Bodhisatto āma mahārājāti vatvā tenahissa javaṃ passissāmīti vutte taṃ assaṃ kappāpetvā abhirūhitvā passatha mahārājāti manusse ussārāpetvā rājaṅgaṇe pāhesi. Sabbaṃ rājaṅgaṇaṃ nirantaraṃ assapantīhi parikkhittamiva ahosi. Puna bodhisatto passatha mahārāja sindhavapotakassa veganti visajjesi. Ekapurisopi taṃ na addasa. Puna rattapaṭaṃ udare parikkhipitvā visajjesi. Rattapaṭamevassa Udare kataṃ mahājanā passiṃsu. Atha naṃ antonagare ekissā pokkharaṇiyā udakapiṭṭhe visajjesi. Tatthassa udakapiṭṭhe dhāvato khuraggānipi na temiṃsu. Punekavāraṃ paduminipattānaṃ upari dhāvanto ekapaṇṇampi udake na osīdāpesi. Evamassa javanasampadaṃ dassetvā oruyha pāṇiṃ paharitvā hatthatalaṃ upanāmesi. Asso uggantvā cattāro pāde ekato katvā hatthatale aṭṭhāsi. Atha mahāsatto rājānaṃ āha mahārāja imassa assapotakassa sabbākārena vege dassanīyamāne samuddapariyante raṭṭhe nikkhipanto nappahotīti. Rājā tussitvā mahāsattassa uparajjaṃ adāsi sindhavapotakampi abhisiñcitvā maṅgalaassaṃ akāsi. So rañño piyo ahosi manāpo. Sakkāropissa mahā ahosi. Tassāpi vasanaṭṭhānaṃ rañño alaṅkatapaṭiyatto vāsitagharagabbho viya ahosi. Catujātikagandhehi bhūmilepanaṃ akaṃsu. Gandhadāmamālādāmādīni ossārayiṃsu. Upari suvaṇṇatārakavicittaṃ celavitānaṃ ahosi. Samantā citrasāṇi parikkhittāva ahosi. Niccaṃ gandhatelappadīpo jhāyi. Uccārapassāvaṭaṭhānepissa suvaṇṇakaṭāhaṃ ṭhapayiṃsu. Niccaṃ rājabhojanameva bhuñji. Tassa pana āgatakālato paṭṭhāya rañño sakalajambūdīparajjaṃ hatthagatameva ahosi. Rājā bodhisattassa ovāde ṭhatvā dānādīni puññāni katvā saggaparāyano ahosi.