Athāparasmiṃ gāmadvāre eko gāmabhojako gāmaṇicandaṃ disvā mātula gāmaṇicanda kahaṃ gacchasīti vatvā rājānaṃ passitunti vutte addhā tvaṃ rājānaṃ passissasi ahaṃ rañño sāsanaṃ dātukāmo harissasīti āha. Āma harissāmīti āha. Pubbe ahaṃ pakatiyā abhirūpo dhanavā yasasampanno arogo idāni Panamhi duggato ceva paṇḍurogo ca jāto tattha kiṃ kāraṇanti rājānaṃ puccha rājā kira paṇḍito so te kathessati tassa sāsanaṃ pana mayhaṃ katheyyāsīti āha. So sādhūti sampaṭicchi. Atha naṃ purato aññatarasmiṃ gāmadvāre ekā gaṇikā disvā mātula gāmaṇicanda kahaṃ yāsīti vatvā rājānaṃ passitunti vutte rājā kira paṇḍito mama sāsanaṃ harāhīti vatvā evamāha ahaṃ pubbe bahuṃ bhatiṃ labhāmi idāni pana tambulamattampi na labhāmi koci me santikaṃ āgato nāma natthi tattha kiṃ kāraṇanti rājānaṃ pucchitvā paccāgantvā mayhaṃ katheyyāsīti. Atha naṃ purato aññatarasmiṃ gāmadvāre ekā taruṇitthī disvā tatheva pucchitvā ahaṃ neva sāmikassa gehe vasituṃ sakkomi na kulagehe tattha kiṃ kāraṇanti rājānaṃ pucchitvā mayhaṃ katheyyāsīti āha. Atha naṃ tato aparabhāge mahāmaggasamīpe ekasmiṃ vammike vasanto sappo disvā gāmaṇicanda kahaṃ yāsīti pucchitvā rājānaṃ passitunti vutte rājā kira paṇḍito sāsanaṃ me harāhīti vatvā ahaṃ gocarāya gamanakāle chātajjhatto milātasarīro vammikato nikkhamanto sarīrena bilaṃ pūretvā sarīraṃ kaḍḍhanto kicchena nikkhamāmi caritvā āgato pana suhito thūlasarīro hutvā pavisanto vilapassāni aphusanto sahasāva pavisāmi tattha kiṃ kāraṇanti rājānaṃ pucchitvā mayhaṃ katheyyāsīti āha. Atha naṃ purato eko migo disvā tatheva pucchitvā ahaṃ aññattha Ṭhāne tiṇaṃ khādituṃ na sakkomi ekasmiññeva rukkhamūle sakkomi tattha kiṃ kāraṇanti rājānaṃ puccheyyāsīti āha. Atha naṃ purato aparabhāge eko tittiro disvā ahaṃ ekasmiññeva vammikaṭṭhāne nisīditvā vassanto manāpaṃ katvā vassituṃ sakkomi sesaṭṭhānesu nisinno na sakkomi tattha kiṃ kāraṇanti rājānaṃ puccheyyāsīti āha. Atha naṃ purato ekā rukkhadevatā disvā gāmaṇicanda kahaṃ yāsīti pucchitvā rañño santikanti vutte rājā kira paṇḍito ahaṃ pubbe sakkāraṃ patto ahosiṃ idāni pana pallavamuṭṭhimattampi na labhāmi tattha kiṃ kāraṇanti rājānaṃ puccheyyāsīti āha. Tato aparabhāge eko nāgarājā taṃ disvā tatheva pucchitvā rājā kira paṇḍito pubbe imasmiṃ sare udakaṃ pasannaṃ maṇivaṇṇaṃ idāni āvilaṃ paṇṇakapariyonaddhaṃ tattha kiṃ kāraṇanti rājānaṃ puccheyyāsīti āha. Atha naṃ purato nagarassa āsannaṭṭhāne ekasmiṃ ārāme vasantā tāpasā disvā tatheva pucchitvā rājā kira paṇḍito pubbe imasmiṃ ārāme phalāphalāni madhurāni ahesuṃ idāni kasaṭāni na madhurāni na rasāni jātāni tattha kiṃ kāraṇanti rājānaṃ puccheyyāsīti āhaṃsu. Tato purato taṃ nagaradvārasamīpe ekissā sālāya brāhmaṇamāṇavakā disvā bho gāmaṇicanda kahaṃ gacchasīti vatvā rañño santikanti vutte tenahi no sāsanaṃ gahetvā gaccha amhākaṃ hi pubbe gahitagahitaṭṭhānaṃ pākaṭaṃ hoti idāni pana chiddaghaṭe udakaṃ viya na Saṇṭhāti na paññāyati andhakāro viya hoti tattha kiṃ kāraṇanti rājānaṃ puccheyyāsīti āhaṃsu. Gāmaṇicando imāni dasa sāsanāni gahetvā rañño santikaṃ agamāsi. Rājā vinicchayaṭṭhāne nisinno ahosi.