Goṇasāmiko gāmaṇicandaṃ gahetvā rājānaṃ upasaṅkami. Rājā gāmaṇicandaṃ disvāva sañjānitvā ayaṃ amhākaṃ pitu upaṭṭhāko amhe ukkhipitvā parihari kahaṃ nukho ettakaṃ kālaṃ vasatīti cintetvā ambho gāmaṇicanda kahaṃ ettakaṃ kālaṃ vasasi cirā paṭṭhāya na paññāyasi kenatthena āgatosīti āha. Āma deva amhākaṃ devassa saggaṃ gamanakālato paṭṭhāya janapadaṃ gantvā kasikammaṃ katvā jīvāmi tato maṃ ayaṃ puriso goṇaaṭṭakāraṇā rājadūtaṃ dassetvā tumhākaṃ santikaṃ ākaḍḍhatīti. Anākaḍḍhiyamāno nāgaccheyyāsīti ākaḍḍhitabhāvoyeva te sobhano idāni taṃ daṭṭhuṃ labhāmi kahaṃ so purisoti. Ayaṃ devāti. Saccaṃ kira bho amhākaṃ candassa dūtaṃ dassesīti. Saccaṃ devāti. Kiṃkāraṇāti. Ayaṃ me deva dve goṇe na detīti. Saccaṃ kira candāti. Tenahi deva mayhampi suṇāthāti sabbaṃ pavuttiṃ kathesi. Taṃ sutvā rājā goṇasāmikaṃ pucchi kiṃ bho tava gehaṃ pavisante goṇe addasāti. Nāddasaṃ devāti. Kiṃ bho maṃ ādāsamukharājā nāmāti kathentānaṃ na sutapubbaṃ tayā nirāsaṅko kathehīti. Addasaṃ devāti. Bho gāmaṇi goṇānaṃ aniyyāditattā goṇā Tava gīvā honti ayaṃ pana puriso disvāva na passāmīti sampajānamusāvādaṃ bhaṇi tasmā tvaññeva kammiko hutvā imassa purisassa ca pajāpatiyā cassa akkhīni uppāṭetvā sayaṃ goṇamūle catuvīsati kahāpaṇe dehīti. Evaṃ vutte goṇasāmikaṃ bahi kariṃsu. So akkhīsu uppāṭitesu kahāpaṇehi kiṃ karissāmīti gāmaṇicandassa pādamūlesu patitvā sāmi canda goṇamūlā kahāpaṇā tuyheva hontu ime ca gaṇhāti aññepi kahāpaṇe datvā palāyi.

Tato dutiyo āha ayaṃ deva mama pajāpatiṃ paharitvā gabbhaṃ pātesīti. Saccaṃ candāti. Suṇāhi mahārājāti cando sabbaṃ vitthāretvā kathesi. Atha naṃ rājā kiṃ pana tvaṃ etassa pajāpatiṃ paharitvā gabbhaṃ pātesīti pucchi. Na pātemi devāti. Ambho sakkhissasi tvaṃ iminā paharitvā gabbhassa pātitabhāvaṃ bhāvetunti. Na sakkomi devāti. Idāni kiṃ karosīti. Puttaṃ me laddhuṃ vaṭṭatīti. Tenahi ambho canda tvaṃ etassa pajāpatiṃ tava gehe karitvā yadā puttaṃ vijātā hoti tadā naṃ netvā etasseva dehīti. Sopi gāmaṇicandassa pādamūlesu patitvā mā me sāmi gehaṃ bhindīti kahāpaṇe datvā palāyi.