Atha tatiyo vatvā iminā me deva paharitvā assapādo bhinnoti āha. Saccaṃ kira candāti. Suṇāhi mahārājāti cando taṃ pavuttiṃ vitthārena kathesi. Taṃ sutvā rājā assagopakaṃ āha Saccaṃ kira tvaṃ assaṃ paharitvā nivattehīti kathesīti. So na kathemi devāti. So puna pucchito āma kathemīti āha. Rājā candaṃ āmantetvā ambho canda ayaṃ kathetvāva na kathemīti musāvādaṃ vadati tvaṃ etassa jivhaṃ chinditvā assamūlaṃ amhākaṃ santakaṃ gahetvā sahassaṃ dehīti āha. Assagopako aparepi kahāpaṇe datvā palāyi.

Tato naḷakāraputto ayaṃ me deva pitughātako coroti āha. Saccaṃ kira candāti. Suṇāhi devāti cando tampi kāraṇaṃ vitthāretvā kathesi. Rājā naḷakāraṃ āmantetvā idāni kiṃ karosīti pucchi. Deva pitaraṃ me laddhuṃ vaṭṭatīti. Ambho canda imassa kira pitaraṃ laddhuṃ vaṭṭati matakaṃ pana na sakkā puna ānetuṃ tvaṃ imassa mātaraṃ ānetvā tava gehe katvā etassa pitā hohīti. Naḷakāraputto mā me sāmi matassa pitu gehaṃ bhindīti gāmaṇicandassa kahāpaṇe datvā palāyi.

Gāmaṇicando ajjeva jayaṃ patvā tuṭṭhacitto rājānaṃ āha atthi deva tumhākaṃ kehici sāsanaṃ pahitaṃ taṃ vo kathemīti. Kathehi candāti. Cando brāhmaṇamāṇavakānaṃ sāsanaṃ ādiṃ katvā paṭilomakamena ekekaṃ kathesi. Rājā paṭipāṭiyā visajjesi. Kathaṃ. Paṭhamaṃ tāva sāsanaṃ sutvā pubbe tesaṃ vasanaṭṭhāne velaṃ jānitvā vassanakukkuṭo ahosi tesaṃ tassa saddena uṭṭhāya mante gahetvā sajjhāyaṃ karontānaññeva aruṇo uggacchati tena tesaṃ gahitagahitaṃ Na nassi idāni pana tesaṃ vasanaṭṭhāne avelāya vassanakukkuṭo atthi so atirattiṃ vā vassati atipabhāte vā atirattiṃ vassantassa tassa saddena uṭṭhāya mante gahetvā niddābhibhūtā sajjhāyaṃ karontā puna sayanti atipabhāte vassantassa saddenuṭṭhāya sajjhāyituṃ na labhanti tena tesaṃ gahitagahitaṃ na paññāyatīti āha. Dutiyampi sutvā te pubbe samaṇadhammaṃ karontā kasiṇaparikamme yuttappayuttā ahesuṃ idāni pana samaṇadhammaṃ visajjetvā akattabbesu kiccesu yuttappayuttā ārāme uppannāni phalāphalāni upaṭṭhākānaṃ datvā piṇḍapaṭipiṇḍakena micchājīvena jīvitaṃ kappenti tena tesaṃ phalāphalāni amadhurāni jātāni sace pana te pubbe viya puna samaṇadhamme yuttappayuttā bhavissanti puna tesaṃ phalāphalāni madhurāni bhavissanti te tāpasā rājakulānaṃ paṇḍitabhāvaṃ na jānanti samaṇadhammaṃ tesaṃ kātuṃ vadehīti āha. Tatiyaṃ sutvā te nāgarājāno aññamaññaṃ kalahaṃ karonti tena taṃ udakaṃ āvilaṃ jātaṃ sace te pubbe viya samaggā bhavissanti puna pasannaṃ udakaṃ bhavissatīti āha. Catutthaṃ sutvā sā rukkhadevatā pubbe aṭaviyaṃ paṭipanne manusse rakkhati tasmā nānappakāraṃ balīkammaṃ labhi idāni pana ārakkhaṃ na karoti tasmā balīkammaṃ na labhi sace pubbe viya ārakkhaṃ karissati puna lābhaggappattā bhavissati sā rañño paṇḍitabhāvaṃ na jānāti tasmā aṭaviṃ ārūhamanussānaṃ rakkhituṃ vadehīti āha. Pañcamaṃ sutvā tasmiṃ vammikapāde nisīditvā So tittiro manāpaṃ vassati tassa heṭṭhā mahantā nidhikumbhī atthi taṃ uddharitvā tvaṃ gaṇhāhīti āha. Chaṭṭhaṃ sutvā yassa rukkhassa mūle so migo tiṇāni khādituṃ sakkoti tassa rukkhassa upari mahantaṃ bhamaramadhu atthi so madhumakkhitesu tiṇesu paluddho aññāni khādituṃ na sakkoti tvaṃ taṃ madhupaṭalaṃ haritvā aggamadhuṃ amhākaṃ pahiṇitvā tato sesaṃ attanā paribhuñjāhīti āha. Sattamaṃ sutvā yasmiṃ vammike so sappo vasati tassa heṭṭhā mahantā nidhikumbhī atthi so taṃ rakkhamāno vasanto nikkhamanakāle dhanalobhena sarīraṃ sithilaṃ katvā lagganto nikkhamati gocaraṃ gahetvā dhanasinehena alaggantova vegena sahasā pavisati taṃ nidhikumabhiṃ uddharitvā tvaṃ gaṇhāhīti āha. Aṭṭhamaṃ sutvā tassā taruṇitthiyā sāmikassa ca mātāpitūnañca vasanagāmānaṃ antare ekasmiṃ gāme jāro atthi sā taṃ saritvā tasmiṃ sinehena sāmikassa gehe vasituṃ asakkontī mātāpitaro passissāmīti gatā jārassa gehe katipāhaṃ vasitvā mātāpitūnaṃ gehaṃ gacchati tattha katipāhaṃ vasitvā puna jāraṃ saritvā sāmikassa gehaṃ gamissāmīti puna jārasseva gehaṃ gacchati tassā itthiyā rājūnaṃ atthibhāvaṃ ācikkhitvā sāmikasseva kira gehe vasatu sace taṃ rājā gaṇhāpeti jīvitaṃ te natthi appamādaṃ kātuṃ vaṭṭatīti tassā kathehīti āha. Navamaṃ sutvā sā gaṇikā pubbe ekassa hatthato bhatiṃ gahetvā taṃ adhivāsetvā aññassa hatthato na gaṇhāti tenassā pubbe bhati Bahu uppajji idāni pana attano dhammataṃ visajjetvā ekassa hatthato gahitaṃ ajīrāpetvāva aññassa hatthato gaṇhāti purimassa okāsaṃ akatvā pacchimakassa karoti tenassā bhati na uppajjati na keci naṃ upasaṅkamanti sace attano dhammatāya ṭhassati pubbe sadisāva bhavissati attano dhamme ṭhātumassā kathehīti āha. Dasamaṃ sutvā so gāmabhojako pubbe dhammena samena aṭṭaṃ vinicchinati tena manussānaṃ piyo ahosi manāpo sampiyāyamānā cassa manussā bahupaṇṇākāraṃ āhariṃsu tena abhirūpo dhanavā yasasampanno ahosi idāni pana lañcacittako hutvā adhammena aṭṭaṃ vinicchinati tena duggato kapaṇo hutvā paṇḍurogena abhibhūto sace pubbe viya dhammena aṭṭaṃ vinicchinissati puna pubbasadiso bhavissati so rañño atthibhāvaṃ na jānāti dhammena aṭṭaṃ vinicchinitumassa kathehīti. Iti so gāmaṇicando imāni ettakāni sāsanāni rañño ārocesi. Rājā attano paññāya sabbānipi tāni pañhāni sabbaññūbuddho viya byākaritvā gāmaṇicandassa bahudhanaṃ datvā tassa vasanagāmaṃ brahmadeyyaṃ katvā tasseva datvā uyyojesi.