So nagarā nikkhamitvā bodhisattena dinnaṃ sāsanaṃ brāhmaṇamāṇavakānaṃ tāpasānaṃ nāgarājassa rukkhadevatāya ca ārocetvā tittirassa nisinnaṭṭhānato nidhiṃ gahetvā migassa tiṇakhādanaṭṭhāne rukkhato bhamaramadhuṃ gahetvā rañño madhuṃ pesetvā sappassa vasanaṭṭhāne vammikaṃ bhinditvā nidhiṃ gahetvā taruṇitthiyā ca gaṇikāya ca Gāmabhojakassa ca rañño kathitaniyāmeneva sāsanaṃ ārocetvā mahantena yasena attano gāmaṃ gantvā yāvatāyukaṃ ṭhatvā yathākammaṃ gato. Ādāsamukharājāpi dānādīni puññāni katvā jīvitapariyosāne saggapadaṃ pūrento gato.

Satthā na bhikkhave tathāgato idāneva mahāpañño pubbepi mahāpaññoyevāti vatvā imaṃ dhammadesanaṃ āharitvā saccāni pakāsetvā jātakaṃ samodhānesi. Saccapariyosāne bahū sotāpannā sakadāgāmino anāgāmino arahanto ahesuṃ. Tadā gāmaṇicando ānando ahosi. Ādāsamukhamahārājā pana ahamevāti.

Gāmaṇicandajātakaṃ sattamaṃ

-------