Anukampaṃ karitvā pemaṃ uppādetvā. Vivanasmīti pānīyarahite araññe. Ghoreti dāruṇe. Pasārayi kicchagatassa pāṇinti nisseṇiṃ bandhitvā kūpaṃ otaritvā dukkhitassa mayhaṃ uttaraṇatthāya viriyapaṭisaṃyuttaṃ hatthaṃ pasāresi. Tenuddhatāriṃ dukhasamparetoti tena kāraṇenamhi dukkhaparitopi tamhā kūpā uttiṇṇo. Etassa kicchena idhānupattoti ahaṃ etassa tāpasassa kicchena etena katassa kicchassānubhāvena idhānuppatto. Veyyāsino vīsayāti veyyāsi vuccati yamo tassa visayo. Jīvaloketi manussaloke. Ahaṃ hi imasmiṃ jīvaloke ṭhitova yamavisayaṃ maccuvisayaṃ paralokaṃ gato nāma ahosiṃ somhi etassa kāraṇā tato puna idhāgatoti vuttaṃ hoti. Lābhārahoti lābhassa araho catupaccayalābhassa anucchaviko. Dethassa bhoganti etena paribhuñjitabbaṃ catupaccayasamaṇaparikkhārasaṅkhātaṃ bhogaṃ etassa detha. Yajitañca yaññanti tvañca amaccā ca nāgarā cāti sabbepi tumhe etassa bhogañca detha yaññañca yajatha. Tassa hi diyyamāno deyyadhammo tena bhuñjitabbattā bhogo hoti itaresaṃ dānayaññattā yaññaṃ. Tenāha dethassa bhogaṃ yajitañca yaññanti.

Evaṃ raññā gagaṇatale candaṃ uṭṭhāpentena viya bodhisattassa guṇe pakāsite tassa guṇo sabbatthakameva pākaṭo jāto. Atirekataro cassa lābhasakkāro udapādi. Tato paṭṭhāya uparājā vā amaccā vā añño vā koci kiñci rājānaṃ vattuṃ na visahi. Rājā bodhisattassa ovāde ṭhatvā dānādīni puññāni katvā saggapūraṃ pūresi. Bodhisattopi abhiññā ca samāpattiyo ca uppādetvā brahmalokaparāyano ahosi.

Satthā porāṇakapaṇḍitāpi upakāravasena kariṃsūti imaṃ dhammadesanaṃ āharitvā jātakaṃ samodhānesi tadā rājā ānando ahosi tāpaso pana ahamevāti.

Tiritivacchajātakaṃ navamaṃ