Vijjhati pitucchāputtassa me kumārassa mantanakhena vijjhatīti ñatvā amma tvaṃ kumārassa santikaṃ agamāsīti pucchi. Āma amma gacchāmīti. Kinte sāsanaṃ kathitanti. Tava bahi karaṇupāyaṃ pucchati ammāti. Rājadhītā paṇḍitopi honto jānissatīti amma imaṃ uggahetvā kumārassa āroceyyāsīti paṭhamaṃ gāthamāha

pāṇi ce muduko cassa nāgo cassa sukārito

andhakāro ca vasseyya atha nūna tadā siyāti.

Sā taṃ uggahetvā kumārassa santikaṃ gantvā amma rājadhītā kiṃ āhāti vutte ayyaputta aññaṃ kiñci avatvā imaṃ gāthaṃ pahiṇīti taṃ gāthaṃ udāhāsi. Kumāro ca tassā atthaṃ ñatvā gaccha ammāti taṃ uyyojesi.