vātaggasindhavajātakaṃ

yenāsi kīsiyā paṇḍūti idaṃ satthā jetavane viharanto sāvatthiyaṃ aññataraṃ kuṭumbikaṃ ārabbha kathesi.

Sāvatthiyaṃ kirekā itthī ekaṃ abhirūpaṃ kuṭumbikaṃ disvā paṭibaddhacittā ahosi. Sakalasarīraṃ jhāyamāno viya tassā abbhantare kilesaggi uppajji. Sā neva kāyassādaṃ na cittassādaṃ alabhi. Bhattampissā na rucci. Kevalaṃ mañcakaaṭaniṃ gahetvā nipajji. Atha naṃ upaṭṭhāyikā ca sahāyikā ca pucchiṃsu kinnukho tvaṃ kampamānacittā aṭaniṃ gahetvā nipannā kinte aphāsukanti. Tāsaṃ ekaṃ dve vāre akathetvā punappunaṃ vuccamānā tamatthaṃ ārocesi. Atha naṃ tā samassāsetvā tvaṃ mā bhoti cintayi mayaṃ taṃ ānessāmāti vatvā gantvā kuṭumbikena saddhiṃ mantesuṃ. So paṭikkhipitvā punappunaṃ vuccamāno adhivāsesi. Tā asukadivase asukavelāya āgacchāhīti paṭiññaṃ gāhetvā gantvā tassā ārocesuṃ. Sā suṇantī attano sayanagabbhaṃ sajjetvā attānaṃ alaṅkaritvā sayanapiṭṭhe nisinnā tasmiṃ āgantvā sayanekadese nisinne cintesi sacāhaṃ imassa gurukaṃ akatvā idāneva okāsaṃ karissāmi isasariyaṃ me parihāyissati āgatadivaseyeva okāsakaraṇaṃ nāma akāraṇaṃ ajja naṃ maṅkuṃ katvā aññasmiṃ divase okāsaṃ karissāmīti. Atha naṃ hatthaggahaṇādivasena keḷiṃ kātuṃ āraddhaṃ hatthe gahetvā apehi apehi na me tayā atthoti nikkaḍḍhesi. So osakkitvā lajjito uṭṭhāya attano gehameva gato. Itarā itthiyo tāya tathākatabhāvaṃ ñatvā kuṭumbike nikkhante taṃ upasaṅkamitvā evamāhaṃsu tvaṃ tasmiṃ paṭibaddhacittā āhāraṃ paṭikkhipitvā nipajji atha naṃ mayaṃ punappunaṃ yācitvā ānayimhā tassa kasmā okāsaṃ na akāsīti. Sā tamatthaṃ ārocesi. Itarā tenahi paññāyissasīti vatvā pakkamiṃsu. Kuṭumbiko puna nivattitvā na olokesi. Sā taṃ alabhamānā sussamānā nirāhārā tattheva jīvitakkhayaṃ pāpuṇi. Kuṭumbiko tassā matabhāvaṃ sutvā bahumālāgandhavilepanaṃ ādāya jetavanaṃ gantvā satthāraṃ pūjetvā vanditvā ekamantaṃ nisīdi satthārā ca kinnukho upāsaka na paññāyasīti pucchito tamatthaṃ ārocetvā svāhaṃ bhante ettakaṃ kālaṃ lajjāya buddhupaṭṭhānaṃ nāgatoti āha. Satthā upāsaka na idāneva sā kilesavasena taṃ pakkosāpetvā āgatakāle taṃ okāsaṃ akatvā lajjāpesi pubbepi pana paṇḍitesupi (pubbe) Paṭibaddhacittā hutvā pakkosāpetvā āgatakāle okāsaṃ akatvā kilametvāva uyyojesīti vatvā tena yācito atītaṃ āhari.