Atīte bārāṇasiyaṃ brahmadatte rajjaṃ kārente bodhisatto sindhavakule nibbattitvā vātaggasindhavo nāma hutvā tassa maṅgalaasso ahosi. Assagopakā taṃ netvā gaṅgāya nhāpenti. Atha naṃ bhaddalī nāma gadrabhī disvā paṭibaddhacittā hutvā kilesavasena kampamānā neva tiṇaṃ khādati na pānīyaṃ pivati parisussitvā kīsā aṭṭhicammamattā ahosi. Atha naṃ gadrabhaputto mātaraṃ parisussamānaṃ disvā kinnukho tvaṃ amma neva tiṇaṃ khādasi na pānīyaṃ pivasi parisussitvā tattha tattha kampamānā nipajjasi kiṃ te aphāsukanti pucchi. Sā akathetvā punappunaṃ vuccamānā tamatthaṃ kathesi. Atha naṃ putto samassāsetvā amma mā cintayi ahaṃ taṃ ānetvā dassāmīti vatvā vātaggasindhavassa nhāyituṃ āgamanakāle taṃ upasaṅkamitvā tāta mayhaṃ mātā tumhesu paṭibaddhacittā nirāhārā sussitvā marissati jīvitadānamassā dethāti āha. Sādhu tāta dassāmi assagopakā maṃ nhāpetvā thokaṃ gaṅgātīre gocaraṇatthāya visajjenti tvaṃ mātaraṃ gahetvā taṃ padesaṃ ehīti. So gantvā mātaraṃ ānetvā tasmiṃ padese visajjetvā ekamantaṃ paṭicchanne aṭṭhāsi. Assagopakāpi vātaggasindhavaṃ tasmiṃ ṭhāne visajjesuṃ. So (vātaggo) gadrabhiṃ

Olokento upasaṅkami. Atha sā gadrabhī tasmiṃ upasaṅkamitvā attano sarīraṃ upasiṅghamāne sacāhaṃ guruṃ akatvā āgatakkhaṇeyevassa okāsaṃ karissāmi evaṃ me yaso ca issariyañca parihāyissati anicchamānāya viya bhavituṃ vaṭṭatīti cintetvā sindhavassa heṭṭhāhanuke pādena paharitvā palāyi. Tato dantamūlassa bhijjitvā gatakālo viya ahosi. Vātaggasindhavo ko me etāya atthoti lajjito tatova palāyi. Sā vippaṭisārinī hutvā tattheva patitvā socamānā nipajji. Atha naṃ putto upasaṅkamitvā pucchanto paṭhamaṃ gāthamāha

yenāsi kīsiyā paṇḍu yena bhattaṃ na ruccati

ayaṃ so āgato bhatto kasmādāni palāyasīti.