Tattha siṅgī migoti siṅgī suvaṇṇavaṇṇamigo dvīhi aḷehi siṅgakiccaṃ sādhentehi yuttatāya siṅgīti attho. Migoti pana sabbasaṅgāhikavasena idha kuḷīroti vutto. Āyatacakkhunettoti ettha dassanaṭṭhena cakkhu nayanaṭṭhena nettaṃ āyatāni cakkhusaṅkhātāni nettāni assāti āyatacakkhunetto dīghaakkhīti attho. Aṭṭhimevassa tacakiccaṃ sādhetīti aṭṭhittaco. Tenābhibhūtoti teneva migena abhibhūto ajjhottharito niccalaggahito hutvā. Kapaṇaṃ rudāmīti kāruññappatto hutvā rodāmi viravāmi. Māheva manti maṃ evarūpaṃ byasanaṃ pattaṃ attano pāṇasamaṃ piyasāmikaṃ tvaṃ māheva jahāti.

Atha sā kareṇukā nivattetvā taṃ assāsiyamānā dutiyaṃ gāthamāha

ayya na taṃ jahissāmi kuñjaraṃ saṭṭhihāyanaṃ

paṭhabyā cāturantāya suppiyo hosi me tuvanti.