Tassattho ye samudde vā gaṅgāya vā yamunāya vā nadiyā kuḷīrā sabbesaṃ vaṇṇasampattiyā ca mahantattena ca tvameva seṭṭho tena taṃ yācāmi mayhaṃ rodamānāya sāmikaṃ muñcāti.

Kuḷīro tassā kathayamānāya itthīsadde nimittaṃ gaṇhitvā ākaḍḍhiyamānaso hutvā vāraṇassa pādato aḷe vinivedhento ayaṃ visaṭṭho idaṃ nāma karissatīti na kiñci aññāsi. Atha naṃ vāraṇo pādaṃ ukkhipitvā piṭṭhiyaṃ akkami. Tāvadeva aṭṭhīni bhijjiṃsu. Vāraṇo tuṭṭharavaṃ viravi. Sabbe vāraṇā sannipatitvā kuḷīraṃ nīharitvā bahithale ṭhapetvā maddantā cuṇṇavicuṇṇamakaṃsu. Tassa dve aḷā sarīrato bhijjitvā ekamantaṃ patiṃsu. So ca kuḷīrarahado gaṅgāya ekābaddho gaṅgāya pūraṇakāle gaṅgodakena pūrati. Udake mandībhūte rahadodakaṃ gaṅgaṃ otarati. Atha dvepi te aḷā uppalavitvā gaṅgāya vuyhiṃsu. Tesu eko samuddaṃ pāvisi. Ekaṃ aḷaṃ dasabhātikarājāno udake kīḷamānā labhitvā aṇikaṃ nāma mudiṅgaṃ akaṃsu. Samuddaṃ paviṭṭhaṃ pana asurā gahetvā aḷambaraṃ nāma bheriṃ kāresuṃ. Te aparabhāge sakkena saṅgāme parājitā taṃ chaḍḍetvā palāyiṃsu. Atha naṃ sakko attano atthāya gāhāpesi. Aḷambaro megho viya thanatīti taṃ sandhāya vadanti.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi. Saccapariyosāne ubhopi jāyapatikā sotāpattiphale patiṭṭhahiṃsu. Tadā kareṇukā ayaṃ upāsikā ahosi. Vāraṇo pana ahamevāti.