byagghajātakaṃ

yena mittena saṃsaggāti idaṃ satthā jetavane viharanto kokālikaṃ ārabbha kathesi. Kokālikavatthu terasanipāte takkāriyajātake āvibhavissati.

Kokāliko pana sārīputtamoggallāne gahetvā āgamissāmīti kāsikaraṭṭhato jetavanaṃ āgantvā satthāraṃ vanditvā there upasaṅkamitvā āvuso raṭṭhavāsino manussā tumhe pakkosanti etha gacchāmāti āha. Gaccha tvaṃ āvuso mayaṃ na gacchāmāti. So therehi paṭikkhitto sayameva agamāsi. Atha bhikkhū dhammasabhāyaṃ kathaṃ samuṭṭhāpesuṃ āvuso kokāliko sārīputtamoggallānehi sahāpi vināpi vattituṃ na sakkoti saṃyogampi na sahati visaṃyogampi na sahatīti. Satthā āgantvā kāyanuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva Pubbepi kokāliko sārīputtamoggallānehi neva saha na vinā vattituṃ sakkotīti vatvā atītaṃ āhari.

Atīte bārāṇasiyaṃ brahmadatte rajjaṃ kārente bodhisatto aññatarasmiṃ araññāyatane rukkhadevatā hutvā nibbatti. Tassa vimānato avidūre aññatarasmiṃ vanappatijeṭṭhake aññatarā rukkhadevatā hutvā vasati. Tasmiṃ vanasaṇḍe sīho ca byaggho ca vasanti. Tesaṃ bhayena na koci tattha khettaṃ kasati na rukakhaṃ chindati nivattetvā oloketuṃ samattho nāma natthi. Te pana sīhabyagghā nānappakārepi mige vadhetvā khādanti khāditāvasesaṃ tattheva pahāya gacchanti. Tesaṃ gandhena so vanasaṇḍo asucikuṇapagandho hoti. Atha itarā rukkhadevatā andhabālā kāraṇākāraṇaṃ ajānamānā ekadivasaṃ bodhisattaṃ āha samma ete no sīhabyagghe nissāya vanasaṇḍo asucikuṇapagandho jāto ahaṃ ete palāpemīti. Bodhisatto samma ime dve nissāya amhākaṃ vimānāni rakkhiyanti etesu palāyantesu vimānāni no nassissanti sīhabyagghānaṃ padaṃ apassantā manussā sabbaṃ vanaṃ chinditvā ekaṅgaṇaṃ katvā khettāni kasanti mā te evaṃ ruccīti vatvā purimā dve gāthā abhāsi