Kurudhammajātakaṃ

tava saddhañca sīlañcāti idaṃ satthā jetavane viharanto ekaṃ haṃsaghātakaṃ bhikkhuṃ ārabbha kathesi.

Sāvatthīvāsino dve sahāyakā bhikkhūsu pabbajitvā laddhupasampadā yebhuyyena ekato vicaranti. Te ekadivasaṃ aciravatiṃ gantvā nhātvā vālukāpuline ātapaṃ tappamānā sārāṇīyakathaṃ kathentā nisīdiṃsu. Tasmiṃ khaṇe dve haṃsā ākāsenāgacchanti. Atheko daharabhikkhu sakkharaṃ gahetvā ekassa haṃsapotakassa akkhiṃ paharāmīti āha. Itaro na sakkhissasīti āha. Tiṭṭhatu imasmiṃ passe akkhi parapasse akkhiṃ paharissāmīti. Idampi na sakkhissasiyevāti. Tenahi upadhārehīti tikhiṇasakkharaṃ gahetvā haṃsassa pacchābhāge khipi. Haṃso sakkharasaddaṃ sutvā nivattitvā olokesi. Atha naṃ itaraṃ sakkharaṃ gahetvā parapasse akkhimhi paharitvā orimakkhinā nikkhāmesi. Haṃso viravanto parivattitvā tesaṃ pādamūleyeva pati. Tattha ṭhitā bhikkhū disvā āgantvā āvuso buddhasāsane pabbajitvā ananucchavikaṃ te kataṃ pāṇātipātaṃ karontenāti vatvā taṃ ādāya tathāgatasseva dassesuṃ. Satthā saccaṃ kira tayā bhikkhu pāṇātipāto katoti pucchitvā saccaṃ bhanteti vutte bhikkhu kasmā evarūpe niyyānikasāsane pabbajitvā evamakāsi porāṇakapaṇḍitāpi anuppannepi

Buddhe agāramajjhe saṅkiliṭṭhavāsaṃ vasamānā appamattakesupi ṭhānesu kukkuccaṃ kariṃsu tvaṃ pana evarūpe sāsane pabbajitvā kukkuccamattampi na akāsi nanu bhikkhunā nāma kāyavācācittasaññatena bhavitabbanti vatvā atītaṃ āhari.