Sakalajambūdīpaṃ unnaṅgalaṃ katvā dānaṃ adāsi. Tassa pana dānajjhāsayatā dānābhiratatā sakalajambūdīpaṃ ajjhotthari. Tasmiṃ kāle kāliṅgaraṭṭhe dantapuranagare kāliṅgarājā rajjaṃ kāresi. Tassa raṭṭhe devo na vassi. Tasmiṃ avassante sakalaraṭṭhe chātakaṃ jātaṃ. Āhāravipattiyā ca manussānaṃ rogo udapādi. Chātakabhayaṃ rogabhayaṃ dubbhikkhabhayanti tīṇi bhayāni uppajjiṃsu. Manussā niggahaṇā dārake hatthesu gahetvā tattha tattha vicaranti. Sakalaraṭṭhavāsino ekato hutvā dantapuraṃ gantvā rājadvāre ukkuṭṭhimakaṃsu. Rājā vātapānaṃ nissāya ṭhito taṃ saddaṃ sutvā kiṃkāraṇā ete vicarantīti pucchi. Mahārāja sakalaraṭṭhe tīṇi bhayāni uppannāni devo na vassati sassāni vipannāni chātakaṃ jātaṃ manussā dubbhojanā rogābhibhūtā niggahaṇā putte hatthesu gahetvā vicaranti devaṃ vassāpehi mahārājāti. Porāṇakarājāno deve avassante kiṃ karontīti. Porāṇakarājāno mahārāja deve avassante dānaṃ datvā uposathaṃ adhiṭṭhāya samādinnasīlā sirigabbhaṃ pavisitvā dabbasanthare sattāhaṃ nipajjanti tadā devo vassatīti. Rājā sādhūti sampaṭicchitvā tathā akāsi. Evaṃ santepi devo na vassati. Rājā amacce āha ahaṃ kattabbaṃ kiccaṃ akāsiṃ devo na vassati kinti karomāti. Mahārāja indapaṭṭanagare dhanañjayakorabyassa rañño añjanasannibho nāma maṅgalahatthī atthi taṃ
Ānessāma evaṃ sante devo vassatīti. So rājā balabāhanasampanno duppasaho kathamassa hatthiṃ ānessāmāti. Mahārāja tena saddhiṃ yuddhakiccaṃ natthi dānajjhāsayo rājā dānābhirato yācito samāno alaṅkatasīsampi chinditvā pasādasampannāni akkhīnipi uppāṭetvā sakalaṃ rajjampi niyyādetvā dadeyya hatthimhi vattabbameva natthi avassaṃ yācito dassatīti. Ke pana taṃ yācituṃ samatthāti. Brāhmaṇā mahārājāti. Rājā brāhmaṇavāsato aṭṭha brāhmaṇe pakkosāpetvā sakkārasammānaṃ katvā hatthiṃ yācanatthāya pesesi. Te paribbayaṃ ādāya addhikavesaṃ gahetvā sabbattha ekarattinivāsena turitagamanaṃ katvā katipāhaṃ nagaradvāre dānasālāsu bhuñjantā sarīraṃ santappetvā kadā rājā dānaggaṃ āgacchissatīti pucchiṃsu. Manussā pakkhassa tayo divase cātuddase paṇṇarase aṭṭhamiyañca āgacchati sve pana puṇṇamī tasmā svepi āgacchissatīti vadiṃsu. Brāhmaṇā punadivase pātova gantvā pācīnadvāre aṭṭhaṃsu. Bodhisatto pātova nhātānulitto sabbālaṅkārapaṭimaṇḍito alaṅkatahatthikkhandhavaragato mahantena parivārena pācīnadvārena dānasālaṃ gantvā otaritvā sattaṭṭhajanānaṃ sahatthā bhattaṃ datvā imināva nīhārena dethāti vatvā hatthiṃ abhiruyhitvā dakkhiṇadvāraṃ agamāsi. Brāhmaṇā pācīnadvāre ārakkhassa balavatāya okāsaṃ alabhitvā dakkhiṇadvārameva gantvā rājānaṃ āgacchantaṃ olokayamānā dvārato nātidūre unnataṭṭhāne ṭhitā Sampattaṃ rājānaṃ hatthe ukkhipitvā jayatu bhavaṃ mahārājāti jayāpesuṃ. Rājā vajiraṅkusena vāraṇaṃ nivattetvā tesaṃ santikaṃ gantvā bho brāhmaṇā kiṃ icchathāti pucchi. Brāhmaṇā bodhisattassa guṇaṃ vaṇṇentā paṭhamaṃ gāthamāhaṃsu