Tadā amhākaṃ bodhisatto suruci nāma brāhmaṇo hutvā "satthāraṃ nimantessāmī"ti upasaṅkamitvā madhuradhammakathaṃ sutvā "sve mayhaṃ bhikkhaṃ gaṇhatha bhante"ti āha. "brāhmaṇa kittakehi te bhikkhūhi attho"ti. "kittakā pana vo bhante parivārā bhikkhū"ti āha. Tadā pana satthu paṭhamasannipātoyeva hoti, tasmā "koṭisatasahassan"ti āha. "bhante sabbehipi saddhiṃ mayhaṃ gehe bhikkhaṃ gaṇhathā"ti. Satthā adhivāsesi. Brāhmaṇo svātanāya nimantetvā gehaṃ gacchanto cintesi "ahaṃ ettakānaṃ bhikkhūnaṃ yāgubhattavatthādīni dātuṃ sakkomi, nisīdanaṭṭhānaṃ pana kathaṃ bhavissatī"ti.
Tassa sā cintā caturāsītiyojanasahassamatthake ṭhitassa devarañño paṇḍukambalasilāsanassa uṇhabhāvaṃ janesi. Sakko "ko nu kho maṃ imasmā ṭhānā cāvetukāmo"ti dibbacakkhunā olokento mahāpurisaṃ disvā "suruci nāma brāhmaṇo buddhappamukhaṃ bhikkhusaṃghaṃ nimantetvā nisīdanaṭṭhānatthāya cintesi, mayāpi tattha gantvā puññakoṭṭhāsaṃ gahetuṃ vaṭṭatī"ti vaḍḍhakivaṇṇaṃ nimminitvā vāsipharasuhattho mahāpurisassa purato pāturahosi. So "atthi nu kho kassaci bhatiyā kattabban"ti āha. Mahāpuriso taṃ disvā "kiṃ kammaṃ karissasī"ti āha. "mama ajānanasippaṃ nāma natthi, gehaṃ vā maṇḍapaṃ vā yo yaṃ kāreti, tassa taṃ kātuṃ jānāmī"ti. "tenahi mayhaṃ kammaṃ atthī"ti. "kiṃ ayyā"ti. "svātanāya me koṭisatasahassabhikkhū nimantitā, tesaṃ nisīdanamaṇḍapaṃ karissasī"ti. "ahaṃ nāma kareyyaṃ, sace me bhatiṃ dātuṃ sakkhissathā"ti. "sakkhissāmi tātā"ti. "sādhu karissāmī"ti gantvā ekaṃ padesaṃ olokesi. Dvādasaterasayojanappamāṇo padeso kasiṇamaṇḍalaṃ viya samatalo ahosi. So "ettake ṭhāne sattaratanamayo Maṇḍapo uṭṭhahatū"ti cintetvā olokesi, tāvadeva paṭhaviṃ bhinditvā maṇḍapo uṭṭhahi, tassa sovaṇṇamayesu thambhesu rajatamayā ghaṭakā ahesuṃ, rajatamayesu sovaṇṇamayā, maṇitthambhesu pavāḷamayā, pavāḷamayesu thambhesu maṇimayā, sattaratanamayesu sattaratanamayāva ghaṭakā ahesuṃ. Tato "maṇḍapassa antarantarena kiṅkiṇikajālaṃ olambatū"ti olokesi, saha olokaneneva kiṅkiṇikajālaṃ olambi, yassa mandavāteritassa pañcaṅgikasseva turiyassa madhurasaddo niggacchati, dibbasaṅgītappavattanakālo viya hoti. "antarantarā gandhadāmamālādāmāni olambantū"ti cintesi, gandhadāmamālādāmāni olambiṃsu. "koṭisatasahassasaṅkhānaṃ bhikkhūnaṃ āsanāni ca ādhārakāni ca paṭhaviṃ bhinditvā uṭṭhahantū"ti cintesi, tāvadeva uṭṭhahiṃsu. "koṇe koṇe ekekā udakacāṭiyo uṭṭhahantū"ti cintesi, udakacāṭiyo uṭṭhahiṃsu.