sirijātakaṃ

yaṃ ussukkā saṅgharantīti idaṃ satthā jetavane viharanto ekaṃ siricorabrāhmaṇaṃ ārabbha kathesi.

Imasmiṃ jātake paccuppannavatthu heṭṭhā khadiraṅgārajātake vitthāritameva. Idha pana sā anāthapiṇḍikassa ghare catutthe dvārakoṭṭhake vasanakā micchādiṭṭhidevatā daṇḍakammaṃ karontī catupaṇṇāsahiraññakoṭiyo āharitvā koṭṭhake pūretvā seṭṭhinā saddhiṃ sahāyikā ahosi. Atha naṃ so ādāya satthu santikaṃ agamāsi. Satthā tassā dhammaṃ desesi. Sā dhammaṃ sutvā sotāpannā ahosi. Tato paṭṭhāya seṭṭhino yaso yathāpurāṇova jāto. Atheko sāvatthīvāsī sirilakkhaṇajānanabrāhmaṇo cintesi Anāthapiṇḍiko duggato hutvā puna issaro jāto yannūnāhaṃ taṃ daṭṭhukāmo viya gantvā tassa gharato siriṃ thenetvā āgaccheyyanti. So tassa gharaṃ gantvā tena katasakkārasammāno sārāṇīyakathāya vattamānāya kimatthaṃ āgatosīti vutte kattha nukho siri patiṭṭhitāti olokesi. Seṭṭhino ca sabbaseto dhotasaṅkhapaṭibhāgo kukkuṭo suvaṇṇapañjare pakkhipitvā ṭhapito atthi. Tassa cūḷāya siri patiṭṭhāsi. Brāhmaṇo olokayamāno siriyā tattha patiṭṭhitabhāvaṃ ñatvā ahaṃ mahāseṭṭhi pañcasate māṇave mante vācemi akālaraviṃ ekaṃ kukkuṭaṃ nissāya te ca mayañca kilamāma ayañca kira kukkuṭo kālaravī imassatthāya āgatomhi dehi me etaṃ kukkuṭanti āha. Gaṇha brāhmaṇa demi te kukkuṭanti. Demīti ca vuttakkhaṇeyeva siri tassa cūḷato apagantvā ussīsake ṭhapite maṇikkhandhe patiṭṭhāsi. Brāhmaṇo siriyā maṇimhi patiṭṭhitabhāvaṃ ñatvā tampi yāci. Maṇimpi demīti vuttakkhaṇeyeva siri maṇito apagantvā ussīsake ṭhapitaārakkhayaṭṭhiyaṃ patiṭṭhāsi. Brāhmaṇo tattha patiṭṭhitabhāvaṃ ñatvā tampi yāci. Gahetvā gacchāti vuttakkhaṇeyeva siri yaṭṭhito apagantvā puññalakkhaṇadeviyā nāma seṭṭhino aggamahesiyā sīse patiṭṭhāsi. Siricorabrāhmaṇo tattha patiṭṭhitabhāvaṃ ñatvā avisajjaniyaṃ bhaṇḍaṃ etaṃ yācitumpi na sakkomīti cintetvā seṭṭhiṃ etadavoca mahāseṭṭhi ahaṃ tumhākaṃ gehe siriṃ thenetvā gamissāmīti āgañchiṃ siri pana te Kukkuṭassa cūḷāya patiṭṭhitā ahosi imasmiṃ mama dinne tato apagantvā maṇimhi patiṭṭhahi maṇimhi dinne ārakkhayaṭṭhiyaṃ patiṭṭhahi ārakkhayaṭṭhiyā dinnāya tato apagantvā puññalakkhaṇadeviyā sīse patiṭṭhahi imaṃkho pana avisajjaniyaṃ bhaṇḍanti na sakkā tava siriṃ thenetuṃ tava santakaṃ taveva hotūti uṭṭhāyāsanā pakkāmi. Anāthapiṇḍiko imaṃ kāraṇaṃ satthu kathessāmīti vihāraṃ gantvā satthāraṃ pūjetvā vanditvā ekamantaṃ nisinno sabbantaṃ tathāgatassa ārocesi. Satthā taṃ sutvā na kho gahapati idāneva aññesaṃ siri aññattha gacchati pubbepi appapuññehi uppāditasiri pana puññavantānaṃyeva pādamūle gatāti vatvā tena yācito atītaṃ āhari.