nānummatto nāpisuṇo nānaṭo nākutūhalo
muḷhesu labhate lābhaṃ esā te anusāsanīti.
Tattha nānummattoti na anummatto. Idaṃ vuttaṃ hoti yathā ummattako nāma itthīpurisadārake disvā tesaṃ vatthālaṅkārādīni vilumpati tato tato macchamaṃsapūvādīni balakkārena gahetvā khādati evameva yo gihībhūto ajjhattabahiddhāsamuṭṭhānaṃ hirottappaṃ pahāya kusalākusalaṃ agaṇetvā nirayabhayaṃ abhāyanto lobhābhibhūto pariyādiṇṇacitto kāmesu pamatto sandhicchedādīni sāhasikakammāni karoti pabbajitopi hirottappaṃ pahāya kusalākusalaṃ agaṇetvā nirayabhayaṃ abhāyanto satthārā paññattaṃ sikkhāpadaṃ maddanto Lobhenābhibhūto pariyādiṇṇacitto cīvarādimattaṃ nissāya attano sāmaññaṃ vijahitvā pamattova vejjakammadūtakammādīni karoti veḷudānādīni nissāya jīvitaṃ kappesi ayaṃ anummattopi ummattasadisattā ummatto nāma evarūpassa khippaṃ lābho uppajjati yo pana evaṃ anummatto lajjī kukkuccako esa muḷhesu apaṇḍitesu purisesu lābhaṃ na labhati tasmā lābhatthikena ummattakena viya bhavitabbanti. Nāpisuṇoti etthāpi yo pana pisuṇo hoti asukena idaṃ nāma katanti rājakule pesuññaṃ upasaṃharati so aññesaṃ yasaṃ acchinditvā attano gaṇhati rājānopi naṃ ayaṃ amhesu sasinehoti uccaṭṭhāne ṭhapenti amaccādayopissa ayaṃ no rājakule paribhindeyyāti bhayena dātabbaṃ maññanti evaṃ etarahi pisuṇassa lābho uppajjati yo pana apisuṇo so na muḷhesu lābhaṃ labhatīti evamattho veditabbo. Nānaṭoti lābhaṃ uppādentena naṭena viya bhavitabbaṃ. Yathā naṭā hirottappaṃ pahāya naccagītavāditehi kīḷaṃ katvā dhanaṃ saṃharanti evameva lābhatthikena hirottappaṃ bhinditvā itthīpurisadārakadārikānaṃ soṇḍasahāyena viya hutvā nānappakāraṃ keḷiṃ karontena vicaritabbaṃ yo evamanaṭo so na muḷhesu lābhaṃ labhati. Nākutūhaloti kutūhalo nāma vikiṇṇavāco. Rājāno hi amaccaparivutā amacce pucchanti asukaṭṭhāne kira manusso mārito gharaṃ viluttaṃ paresaṃ dārā padhaṃsitāti suyyati kesaṃ nukho idaṃ kammanti. Tattha sesesu akathitesuyeva yo Uṭṭhahitvā asuko ca asuko ca nāmāti vadati ayaṃ kutūhalo nāma. Rājāno tassa vacanena te purise pariyesetvā nisedhetvā imaṃ nissāya no nagaraṃ niccoraṃ jātanti tassa mahantaṃ yasaṃ denti. Sesāpi janā ayaṃ no rājapurisehi puṭṭho suyuttaduyuttaṃ katheyyāti bhayena tasseva dhanaṃ denti. Evaṃ kutūhalassa lābho uppajjati. Yo pana akutūhalo esa na muḷhesu lābhaṃ labhati. Esā te anusāsanīti yā esā amhākaṃ santakā tuyhaṃ lābhānusiṭṭhīti.