sā caṇḍī kāhatī kodhaṃ taṃ me tappati no idha

esa uppalasannāho nikkhañcussīsake kataṃ

kāsikañca muduṃ vatthaṃ tappetu dhanakāmiyāti.

Tattha ḍemānāti ḍeyamāna gacchamāna. Pattayānāti tameva ālapati tathā vihaṅgamāti. So hi pattehi yānaṃ katvā gamanato pattayāno ākāsena gamanato vihaṅgamo. Vajjāsīti vadeyyāsi. Vāmūrunti kadalikkhandhasamānaūruṃ mama sūle nisinnabhāvaṃ vadeyyāsi. Ciraṃ kho sā karissatīti sā imaṃ pavuttiṃ ajānamānā mama āgamanaṃ ciraṃ karissati cirameva gatassa piyassa na ca āgacchatīti evaṃ cintessatīti attho. Asisattiñcāti asisamānatāya sattisamānatāya ca sūlameva sandhāya vadati. Tañhi tassa uttāsanatthāya oḍitaṃ ṭhapitaṃ. Caṇḍīti kodhanā. Kāhatī kodhanti aticirāyatīti mayhaṃ kodhaṃ karissati. Taṃ me tappatīti taṃ tassā kujjhanaṃ maṃ tappati. No idhāti idha pana imaṃ sūlaṃ maṃ na tappatīti dīpeti. Esa uppalasannāhoti ādīhi ghare ussīsake ṭhapitaṃ attano bhaṇḍaṃ ācikkhati. Tattha uppalasannāhoti uppalo ca sannāho ca uppalasadiso kaṇayo ca sannāhappatto cāti attho. Nikkhañcāti pañcahi suvaṇṇehi kataṃ aṅguliyakaṃ. Kāsikañca muduṃ vatthanti mudukāsikasāṭakayugaṃ sandhāyāha ettakaṃ kira tena ussīsake nikkhittaṃ.