vivaratha imāsaṃ dvāranti idaṃ satthā jetavane viharanto catunnaṃ paribbājikānaṃ pabbajjaṃ ārabbha kathesi.
Vesāliyaṃ kira licchavirājūnaṃ satta sahassāni satta satāni satta ca licchavī vasiṃsu. Te sabbepi pucchāpaṭipucchācittakā ahesuṃ. Atheko pañcasu vādasatesu byatto niggaṇṭho vesāliyaṃ sampāpuṇi. Te tassa saṅgahaṃ akaṃsu. Aparāpi evarūpā niggaṇṭhī sampāpuṇi. Rājāno dvepi jane vādaṃ kāresuṃ. Ubhopi sadisāva ahesuṃ. Tato licchavīnaṃ etadahosi ime dve paṭicca uppanno putto byatto bhavissatīti. Tesaṃ vivāhaṃ kāretvā dvepi ekato vāsesuṃ. Atha nesaṃ saṃvāsamanvāya paṭipāṭiyā catasso dārikāyo vijāyiṃsu eko ca dārako vijāyi. Dārikānaṃ saccā sobhā adhivādakā paṭiccharāti nāmaṃ akaṃsu. Dārakassa saccakoti nāmaṃ. Te pañcapi janā viññutaṃ patvā mātito pañca vādasatāni pitito pañca vādasatānīti vādasahassaṃ uggaṇhiṃsu. Mātāpitaro dārikāyo
Evaṃ ovadiṃsu sace koci gihī tumhākaṃ vādaṃ bhindissati tassa pādaparicārikā bhaveyyātha sace pabbajito bhindissati tassa santike pabbajeyyāthāti. Aparabhāge mātāpitaro kālamakaṃsu. Tesu kālakatesu sabbakaniṭṭho niggaṇṭho tattheva vesāliyaṃ licchavīnaṃ sippaṃ sikkhāpento vasi. Bhaginiyo jambūsākhaṃ gahetvā vādatthāya nagarena nagaraṃ caramānā sāvatthiṃ patvā nagaradvāre jambūsākhaṃ nikkhipitvā yo amhākaṃ vādaṃ āropetuṃ sakkoti gihī vā pabbajito vā so etaṃ paṃsupuñjaṃ pādehi vikīritvā pādeheva sākhaṃ maddatūti dārakānaṃ vatvā bhikkhatthāya nagaraṃ pāvisiṃsu. Athāyasmā sārīputto asammajjanaṭṭhānaṃ sammajjitvā rittaghaṭesu pānīyaṃ upaṭṭhapetvā gilāne paṭijaggitvā divātaraṃ sāvatthiyaṃ piṇḍāya pavisanto taṃ sākhaṃ disvā pucchitvā dārakeheva pātāpetvā maddāpetvā yehi ayaṃ sākhā ṭhapitā te katabhattakiccā āgantvā jetavanadvārakoṭṭhake maṃ passantūti dārakānaṃ vatvā nagaraṃ pavisitvā katabhattakicco vihārakoṭṭhake aṭṭhāsi. Tāpi paribbājikā bhikkhaṃ caritvā āgatā sākhaṃ madditaṃ disvā kenāyaṃ madditāti vatvā sārīputtattherena sace tumhe vādatthikā vihārakoṭṭhakaṃ kira gacchathāti dārakehi vuttā puna nagaraṃ pavisitvā mahājanaṃ sannipātetvā vihārakoṭṭhakaṃ gantvā theraṃ vādasahassaṃ pucchiṃsu. Thero visajjetvā aññaṃ kiñci jānitthāti pucchi. Na jānāma sāmīti. Ahaṃ pana