Dassetvā tumhe mā bhāyittha yuddhe sati ahaṃ jānissāmi imā uttamarūpadharā rājadhītaro aggamahesiyo karothāti tāsaṃ abhisekaṃ dāpetvā tāhi saddhiṃ āgatapurise gacchatha tumhe rājadhītānaṃ assakarājena mahesiṭṭhāne ṭhapitabhāvaṃ tumhākaṃ rañño ācikkhathāti uyyojesi. Te gantvā ārocesuṃ. Kāliṅgo naha nūna so mayhaṃ balaṃ jānātīti tāvadeva mahatiyā senāya nikkhami. Nandaseno tassāgamanaṃ ñatvā attano kira rajjasīmāyameva hotu mā amhākaṃ rañño rajjasīmaṃ okkamatu ubhinnaṃ raṭṭhānaṃ antare yuddhaṃ bhavissatīti sāsanaṃ pesesi. So sāsanaṃ sutvā attano rajjapariyanteva aṭṭhāsi. Assakopi attano rajjapariyanteyeva aṭṭhāsi.
Tadā bodhisatto isipabbajjaṃ pabbajitvā tesaṃ dvinnaṃ rājūnaṃ antare paṇṇasālāyaṃ vasati. Kāliṅgo samaṇā nāma kiñci jānanti ko jānāti kiṃ bhavissati kassa jayo vā parājayo vā bhavissati tāpasaṃ pucchissāmīti aññātakavesena bodhisattaṃ upasaṅkamitvā vanditvā ekamantaṃ nisīditvā paṭisanthāraṃ katvā bhante kāliṅgo ca assako ca yujjhitukāmā attano attano rajjasīmāyameva ṭhitā etesu kassa jayo kassa parājayo bhavissatīti pucchi. Mahāpuñña ahaṃ asukassa jayo asukassa parājayoti na jānāmi sakko pana devarājā idhāgacchati tamahaṃ pucchitvā kathessāmi sveva āgaccheyyāsīti. Sakko bodhisattassa upaṭṭhānaṃ āgantvā nisīdi. Atha naṃ bodhisatto tamatthaṃ pucchi. Bhante kāliṅgo jinissati Assakova parājissati idañca pubbanimittaṃ paññāyissatīti. Kāliṅgo punadivase āgantvā pucchi. Bodhisattopissa ācikkhi. So kiṃ nāma pubbanimittaṃ bhavissatīti apucchitvāva ahaṃ kira jinissāmīti tuṭṭhiyā pakkāmi. Sā kathā vitthārikā ahosi. Taṃ sutvā assako nandasenaṃ pakkosāpetvā kāliṅgo kira jinissati mayaṃ parājissāma kinnukho kātabbanti āha. So ko etaṃ mahārāja jānāti kassa jayo vā parājayo vā tumhe mā cintayitthāti rājānaṃ assāsetvā bodhisattaṃ upasaṅkamitvā vanditvā ekamantaṃ nisinno bhante ko jinissati ko parājissatīti pucchi. Kāliṅgo jinissati assako parājissatīti. Bhante jinantassa kiṃ pubbanimittaṃ bhavissati kiṃ parājinantassāti. Mahāpuñña jinantassa ārakkhadevatā sabbaseto usabho bhavissati itarassa sabbakāḷako ubhinnampi ārakkhadevatā yujjhitvā jayaparājayaṃ karissatīti. Nandaseno taṃ sutvā uṭṭhāya gantvā rañño sahāyā sahassamattā mahāyodhā te gahetvā avidūre pabbataṃ āruyha ambho amhākaṃ rañño jīvitaṃ dātuṃ sakkhissathāti pucchi. Āma sakkhissāmāti. Tenahi imasmiṃ papāte patathāti. Te patitukāmā ahesuṃ. Atha ne vāretvā alaṃ ettha patanena amhākaṃ rañño jīvitaṃ dātuṃ suhadayā anivattino hutvā yujjhathāti āha. Te sampaṭicchiṃsu. Atha saṅgāme paccupaṭṭhite kāliṅgo ahaṃ kira jinissāmīti vosānamāpādi. Balanikāyāpissa amhākaṃ kira jayoti Vosānaṃ āpajjitvā sannāhaṃ akatvā vaggavaggā hutvā yathāruciṃ pakkamiṃsu viriyakaraṇakāle viriyaṃ na kariṃsu. Ubhopi rājāno assaṃ abhirūhitvā yujjhissāmāti aññamaññaṃ upasaṅkamiṃsu. Ubhinnaṃ ārakkhadevatā purato gantvā kāliṅgassa ārakkhadevatā sabbaseto usabho ahosi itarassa sabbakāḷako. Tepi aññamaññaṃ yujjhanākāraṃ dassentā upasaṅkamiṃsu. Te pana usabhā dvinnaṃ rājūnameva paññāyanti na aññesaṃ. Nandaseno assakaṃ pucchi paññāyati te mahārāja ārakkhadevatāti. Āma paññāyatīti. Kenākārenāti. Kāliṅgassa ārakkhadevatā sabbaseto usabho hutvā paññāyati amhākaṃ ārakkhadevatā sabbakāḷako hutvā paññāyatīti. Mahārāja tumhe mā bhāyittha mayaṃ jinissāma kāliṅgo parājissati tumhe assapiṭṭhito otaritvā imaṃ sattiṃ gahetvā susikkhitaṃ sindhavaṃ udarapasse bāmahatthena uppīḷetvā iminā purisasahassena saddhiṃ vegasā gantvā kāliṅgassa ārakkhadevataṃ sattippahārena pātetha tato mayaṃ sahassamattā sattisahassena paharissāma evaṃ kāliṅgassa ārakkhadevatā nassissati tato kāliṅgo parājissati mayaṃ jinissāmāti. Rājā sādhūti nandasenena dinnasaññāya gantvā sattiyā pahari. Amaccāpi sattisahassena pahariṃsu. Ārakkhadevatā tattheva jīvitakkhayaṃ pāpuṇi. Tāvadeva kāliṅgo parājitvā palāyi. Taṃ palāyamānaṃ disvā sahassamattā amaccā