Kalāpu rājā surāmadamatto nāṭakaparivuto mahantena yasena rājuyyānaṃ gantvā maṅgalasilāpaṭṭe sayanaṃ attharāpetvā ekissā manāpāya itthiyā aṅke sayati. Gītavāditanaccesu chekā nāṭakitthiyo gītādīni payojayiṃsu. Sakkassa devarañño viya sampatti ahosi. Rājā niddaṃ okkami. Atha tā itthiyo yassatthāya mayaṃ gītādīni payojayāma so niddaṃ upagato kinno gītādīhīti vīṇādīni turiyāni tattha tattheva chaḍḍetvā uyyānaṃ pakkantā pupphaphalapallavādīhi palobhiyamānā uyyāne abhiramiṃsu. Tadā bodhisatto tasmiṃ uyyāne supupphitasālamūle pabbajjāsukhena vītināmento mattavaravāraṇo viya nisinno hoti. Atha tā itthiyo uyyānaṃ pakkantā caramānā taṃ disvā etha ayyo no ekasmiṃ rukkhamūle pabbajito nisinno yāva rājā na pabujjhati tāvassa santike kiñci suṇamānā nisīdissāmāti gantvā vanditvā parivāretvā nisinnā amhākaṃ kathetabbayuttakaṃ kiñci kathethāti vadiṃsu. Bodhisatto tāsaṃ dhammaṃ kathesi. Atha sā itthī aṅgaṃ cāletvā rājānaṃ pabodhesi. Rājā pabuddho tā apassanto kahaṃ gatā vasaliyoti āha. Etā mahārāja gantvā ekaṃ tāpasaṃ parivāretvā nisīdiṃsūti. Rājā kupito khaggaṃ gahetvā sīsampi tassa kūṭajaṭilassa chindissāmīti vegena agamāsi. Atha tā itthiyo rājānaṃ kuddhaṃ āgacchantaṃ disvā tāsu vallabhatarā gantvā rañño hatthā asiṃ gahetvā rājānaṃ vūpasamesuṃ. So āgantvā Bodhisattassa santike ṭhatvā kiṃvādī tvaṃ samaṇāti pucchi. Khantivādī mahārājāti. Kā esā khanti nāmāti. Akkosantesu paharantesu paribhavantesu akujjhanabhāvoti. Rājā passissāmidāni te khantiyā atthibhāvanti coraghātakaṃ pakkosāpesi. So attano cārittena pharasuñca kaṇṭakakasañca ādāya kāsāvanivāsano rattamālādharo āgantvā rājānaṃ vanditvā kiṃ karomīti āha. Imaṃ coraduṭṭhatāpasaṃ gahetvā kaḍḍhitvā bhūmiyaṃ pātetvā kaṇṭakakasaṃ gahetvā purato ca pacchato ca ubhosu passesu cāti catūsu passesu dve pahārasahassāni dehīti. So tathā akāsi. Bodhisattassa chavi chijji cammaṃ chijji maṃsaṃ chijji lohitaṃ paggharati. Puna rājā kiṃvādī tvanti āha. Khantivādī mahārāja tvaṃ pana mayhaṃ cammantare khantīti maññasi na mayhaṃ cammantare khanti tayā pana daṭṭhuṃ asakkuṇeyye hadayabbhantare mama khanti patiṭṭhitā mahārājāti. Puna coraghātako kiṃ karomīti pucchi. Imassa kūṭajaṭilassa ubho hatthe chindāti. So pharasuṃ gahetvā gaṇṭhikāyaṃ ṭhapetvā hatthe chindi. Atha naṃ pāde chindāti āha. Pādepi chindi. Hatthapādakoṭīhi ghaṭacchiddehi lākhāraso viya lohitaṃ paggharati. Puna rājā kiṃvādīti pucchi. Khantivādī mahārāja tvaṃ pana mayhaṃ hatthapādakoṭīsūti maññasi natthesā ettha mayhaṃ hi khanti gambhīraṭṭhāne hadayabbhantare patiṭṭhitāti. So kaṇṇanāsamassa chindāti āha. Itaro kaṇṇanāsaṃ chindi. Sakalasarīre Lohitaṃ ahosi. Puna kiṃvādī tvanti pucchi. Mahārāja khantivādīti. Mā kho pana tvaṃ kaṇṇanāsikakoṭīsu patiṭṭhitā khantīti maññasi mama khanti gambhīre hadayabbhantare patiṭṭhitāti. Rājā kūṭajaṭila tava khantiṃ tvameva ukkhipitvā nisīdāti bodhisattassa hadayaṃ pādena paharitvā pakkāmi. Tasmiṃ gate senāpati bodhisattassa sarīrato lohitaṃ puñchitvā hatthapādakaṇṇanāsakoṭiyo sāṭakakaṇṇe katvā bodhisattaṃ saṇikaṃ nisīdāpetvā vanditvā ekamantaṃ nisīditvā sace bhante tumhe kujjhitukāmā tumhesu katāparādhassa rañño kujjheyyātha mā aññesanti yācanto paṭhamaṃ gāthamāha