sasapaṇḍitajātakaṃ

satta me rohitā macchāti idaṃ satthā jetavane viharanto sabbaparikkhāradānaṃ ārabbha kathesi.

Sāvatthiyaṃ kireko kuṭumbiko buddhappamukhassa bhikkhusaṅghassa sabbaparikkhāradānaṃ sajjetvā gharadvāre maṇḍapaṃ kāretvā buddhappamukhaṃ bhikkhusaṅghaṃ nimantetvā susajjitamaṇḍape pavarāsane nisīdāpetvā Nānaggarasaṃ paṇītadānaṃ datvā puna svātanāya sattāhaṃ nimantetvā sattame divase buddhappamukhānaṃ pañcannaṃ bhikkhusatānaṃ sabbaparikkhāraṃ adāsi. Satthā bhattakiccāvasāne anumodanaṃ karonto upāsaka tayā pītisomanassaṃ kātuṃ vaṭṭati idañca dānaṃ nāma porāṇakapaṇḍitānaṃ vaṃso porāṇakapaṇḍitā hi sampattayācakānaṃ jīvitaṃ pariccajitvā attano maṃsampi adaṃsūti vatvā tena yācito atītaṃ āhari.

Atīte bārāṇasiyaṃ brahmadatte rajjaṃ kārente bodhisatto sasayoniyaṃ nibbattitvā araññe vasi. Tassa pana araññassa ekato pabbatapādo ekato nadī ekato paccantagāmo ahosi. Aparepissa tayo sahāyā ahesuṃ makkaṭo sigālo uddoti. Te cattāropi paṇḍitā ekato vasantā attano attano gocaraṭṭhāne gocaraṃ gahetvā sāyaṇhasamaye ekato sannipatanti. Sasapaṇḍito dānaṃ dātabbaṃ sīlaṃ rakkhitabbaṃ uposathakammaṃ kātabbanti tiṇṇaṃ janānaṃ ovādavasena dhammaṃ desesi. Te tassa ovādaṃ sampaṭicchitvā attano attano nivāsanagumbaṃ pavisitvā vasanti. Evaṃ kāle gacchante ekadivasaṃ bodhisatto ākāsaṃ oloketvā candaṃ disvā sve uposathadivasoti ñatvā itare tayo āha sve uposatho tumhepi tayo janā sīlaṃ samādiyitvā uposathikā hotha sīle patiṭṭhāya dinnadānaṃ mahapphalaṃ hoti tasmā yācake sampatte tumhe khāditabbāhārarasaṃ datvā khādeyyāthāti. Te sādhūti Sampaṭicchitvā attano attano vasanaṭṭhānesu vasiṃsu. Punadivase tesu uddo pātova gocaraṃ pariyesissāmīti cintetvā gaṅgātīraṃ gato. Atheko bālisiko satta rohitamacche uddharitvā valliyāva āvuṇitvā gaṅgātīre vālikaṃ viyūhitvā bālikāya paṭicchādetvā puna macche gaṇhanto adhogaṅgaṃ gacchi. Uddo macchagandhaṃ ghāyitvā bālikaṃ viyūhitvā macche disvā nīharitvā atthi nukho etesaṃ sāmikoti tikkhattuṃ ghosetvā sāmikaṃ apassanto vallīkoṭiṃ ḍaṃsitvā netvā attano vasanagumbe ṭhapetvā velāyameva khādissāmīti attano sīlaṃ āvajjento nipajji. Sigālopi nikkhamitvā gocaraṃ pariyesanto ekassa khettagopakassa kuṭiyaṃ dve maṃsasūlāni ekañca godhaṃ ekañca dadhivārakaṃ disvā atthi nukho etassa sāmikoti tikkhattuṃ ghosetvā sāmikaṃ adisvā dadhivārakassa uggahaṇarajjukaṃ gīvāyaṃ pavesetvā maṃsasūle ca godhañca mukhena ḍaṃsitvā netvā attano sayanagumbe ṭhapetvā velāyameva khādissāmīti attano sīlaṃ āvajjento nipajji. Makkaṭopi vanasaṇḍaṃ pavisitvā ambapiṇḍaṃ āharitvā attano vasanaṭṭhānagumbe ṭhapetvā velāyameva khādissāmīti attano sīlaṃ āvajjento nipajji. Bodhisatto pana velāyameva nikkhamitvā dabbatiṇāni khādissāmīti attano vasanagumbeyeva nipanno cintesi mama santikaṃ āgatānaṃ yācakānaṃ tiṇāni dātuṃ na sakkā tilataṇḍulādayopi mayhaṃ natthi sace mama santikaṃ yācako āgacchissati attano sarīramaṃsaṃ dassāmīti. Tassa sīlatejena sakkassa Bhavanaṃ uṇhākāraṃ dassesi. Taṃ kira sakkassa āyukkhayena vā uṇhaṃ hoti puññakkhayena vā aññasmiṃ vā mahānubhāve satte taṃ ṭhānaṃ paṭṭhente dhammikasamaṇabrāhmaṇānaṃ sīlatejena. Tadā sīlatejena uṇhaṃ ahosi. So āvajjamāno imaṃ kāraṇaṃ ñatvā sasarājaṃ vīmaṃsissāmīti paṭhamaṃ uddassa vasanaṭṭhānaṃ gantvā brāhmaṇavesena aṭṭhāsi. Brāhmaṇa kimatthaṃ āgatosīti vutte paṇḍita sace kiñci āhāraṃ labheyyaṃ uposathiko hutvā samaṇadhammaṃ kareyyanti. So sādhu dassāmi te āhāranti tena saddhiṃ sallapanto paṭhamaṃ gāthamāha