Atīte bārāṇasiyaṃ brahmadatte rajjaṃ kārente bodhisatto tassa sabbakiccakārako amacco ahosi. Athekadivasaṃ rājā rājaputtaṃ upaṭṭhānaṃ āgacchantaṃ disvā ayaṃ mama antare dubbheyyāti taṃ pakkosāpetvā tāta yāvāhaṃ jīvāmi tāva nagare vasituṃ na lacchasi aññattha vasitvā mamaccayena rajjaṃ kārehīti āha. So sādhūti pitaraṃ vanditvā jeṭṭhabhariyāya saddhiṃ nagarā nikkhamitvā paccantaṃ gantvā araññe paṇṇasālaṃ māpetvā vanamūlaphalāphalena yāpento vihāsi. Aparabhāge rājā kālamakāsi. Uparājā nakkhattaṃ olokento tassa kālakatabhāvaṃ ñatvā bārāṇasiṃ āgacchanto antarāmagge ekaṃ pabbataṃ addasa. Atha naṃ bhariyā āha sace deva ayaṃ pabbato suvaṇṇamayo assa dadeyyāsi me kiñcīti. Kāsi tvaṃ kiñci na dassāmīti. Sā ahaṃ imasmiṃ sinehena cajituṃ asakkontī araññaṃ pāvisiṃ ayañca evaṃ vadeti ativiya thaddhahadayo rājā hutvā esa mayhaṃ kalyāṇaṃ na karissatīti anattamanā ahosi. So āgantvā rajje patiṭṭhito taṃ aggamahesiṭṭhāne ṭhapesi idaṃ yasamattakamevādāsi.
Uttariṃ pana sakkārasammāno natthi. Tassā atthibhāvampi na jānāti. Bodhisatto ayaṃ devī imassa rañño upakārikā dukkhaṃ agaṇetvā araññavāsaṃ vasi ayaṃ panetaṃ agaṇetvā aññāhi saddhiṃ abhiramanto vicarati yathā esā sabbissariyaṃ labhati tathā karissāmīti cintetvā ekadivasaṃ taṃ upasaṅkamitvā mahādevi mayaṃ tumhākaṃ santikā piṇḍamattampi na labhāma kasmā amhesu pamajjittha ativiya thaddhahadayāti āha. Sā devī tāta sacāhaṃ attanā labheyyaṃ tuyhampi dadeyyaṃ alabhamānā pana kiṃ dassāmi rājāpi mayhaṃ idāni kinnāma dassati tāta so antarāmagge imasmiṃ pabbate suvaṇṇamaye jāte mayhaṃ kiñci dassasīti vutte kāsi tvaṃ na kiñci dassāmīti āha supariccajampi na pariccajīti. Kiṃ pana rañño santike imaṃ kathaṃ kathetuṃ sakkhissathāti. Kiṃ na sakkhissāmi tātāti. Tenahi rañño santike ṭhito pucchissāmi tumhe katheyyāthāti. Sādhu tātāti. Bodhisatto deviyā rañño upaṭṭhānaṃ gantvā ṭhitakāle āha nanu ayye mayaṃ tumhākaṃ santikā kiñcipi na labhāmāti. Tāta ahaṃ labhamānā tuyhaṃ dadeyyaṃ ahameva kiñci na labhāmi rājāpi idāni mayhaṃ kinnāma dassati so hi araññato āgamanakāle ekaṃ pabbataṃ disvā sacāyaṃ pabbato suvaṇṇamayo assa kiñci me dadeyyāsīti vutte kāsi tvaṃ na kiñci dassāmīti vadati supariccajampi na pariccajīti etamatthaṃ dīpentī paṭhamaṃ gāthamāha