yamhi kayirā tamhi vade yaṃ na kayirā na taṃ vade
akarontaṃ bhāsamānaṃ parijānanti paṇḍitāti.
Tassattho yadeva hi paṇḍito puriso kāyena kareyya taṃ vācāya vadeyya yampi na kayirā na taṃ vadeti. Dātukāmova dammīti vadeyya na adātukāmoti adhippāyo. Kiṃkāraṇā. Yo hi dassāmīti vatvāpi pacchā na dadāti taṃ akarontaṃ kevalaṃ musā bhāsamānaṃ. Parijānanti paṇḍitāti ahaṃ dassāmīti vacanamattameva bhāsati na pana deti yaṃ hi kho pana adinnampi vacanamatteneva dinnaṃ hoti taṃ puretarameva laddhannāma bhavissatīti evaṃ tassa musāvādibhāvaṃ paṇḍitā jānanti bālā pana vacanamatteneva tussantīti.
Taṃ sutvā devī rañño añjalimpaggahetvā tatiyaṃ gāthamāha