Amhe ete upadhārentīti ñatvā rājaṅgaṇe uppatitvā mahantena devānubhāvena ākāse aṭṭhaṃsu. Mahājano sannipati. Rājāpi seṭṭhiuparājādayopi āgamiṃsu. Atha ne kataradevalokato sāmi āgacchathāti pucchiṃsu. Tāvatiṃsadevalokato āgacchāmāti. Kena kammena āgatatthāti. Ussavadassanatthāyāti. Kiṃ pupphāni nāmetānīti. Dibbāni kakkārupupphāni nāmāti. Sāmi tumhe devaloke aññāni pilandheyyātha imāni amhākaṃ dethāti. Devaputtā imāni dibbapupphāni mahānubhāvāni devānaññeva anucchavikāni manussaloke lāmakānaṃ duppaññānaṃ hīnādhimuttikānaṃ dussīlānaṃ ananucchavikāni ye pana manussā imehi ca guṇehi samannāgatā tesaṃ etāni anucchavikānīti. Evañca pana vatvā tesu jeṭṭhakadevaputto paṭhamaṃ gāthamāha

kāyena yo nāvahare vācāya na musā bhaṇe

yaso laddhā na majjeyya save kakkārumarahatīti.

Tassattho kāyena parassa santakaṃ tiṇasalākampi nāvaharati vācāya ca jīvitaṃ pariccajamānopi musāvādaṃ na bhaṇeyya. Desanāsīsamevetaṃ. Kāyadvāravacīdvāramanodvārehi pana yo dasapi akusalakammapathe na karotīti ayamettha adhippāyo. Yaso laddhāti issariyampi labhitvā yo issariyamadamatto satiṃ osajjetvā pāpakammaṃ na karoti save evarūpo imehi guṇehi yutto puggalo imaṃ dibbapupphaṃ arahati tasmā yo imehi guṇehi samannāgato So imāni pupphāni yācituṃ arahati dassāmassāti.