@4 vītaṃ ananusocitaṃ. Yassātipi pāṭho. Yaṃ yaṃ yassa vijjati tañce so anusoceyyāti attho. Maccuvasampattanti evaṃ sante niccaṃ maccuvasaṃ pattaṃ gacchantaṃ attānameva anusoceyya tenassa anusocanakāloyeva na bhaveyyāti attho.

Tatiyagāthāya. Na heva ṭhitaṃ nāsīnaṃ na nipannaṃ na patthaguṃ kiñci sattaṃ āyusaṅkhāro anugacchatīti pāṭhaseso. Tattha patthagunti samparivattetvā caramānaṃ. Idaṃ vuttaṃ hoti ime sattā catūsu iriyāpathesu pamattā viharanti āyusaṅkhārā pana rattiñca divañca sabbiriyāpathesu appamattā attano khayagamanakammameva karontīti. Yāvuppatti nimissatīti ayamhi tasmiṃ kāle vohāro. Idaṃ vuttaṃ hoti yāva ummissati ca nimmissati ca tatrāpi evaṃ appamattake kāle imesaṃ sattānaṃ sarati vayo tīsu vayesu seso vayo parihāyateva na vaḍḍhati. Tatthattani vatappantheti tattha vata attani panthe. Idaṃ vuttaṃ hoti tasmiṃ vata evaṃ saramāne vaye ayaṃ attāti saṅkhyaṃ gato attabhāvo pantho hoti pāsena bandho upaḍḍho aparipuṇṇova hoti evaṃ tattha imasmiṃ attani panthe yo cesa tattha tattha nibbattānaṃ vinābhāvo asaṃsayo tasmiṃ vinābhāvepi asaṃsaye nissaṃsaye bhūtaṃ sesaṃ amataṃ taṃ sesaṃ jīvamānaṃ jīvamānameva dayitabbaṃ mettāyitabbaṃ ayaṃ satto arogo hotu abyāpajjhoti evaṃ tasmiṃ mettābhāvanā kātabbā yaṃ panetaṃ cavitaṃ vigataṃ mataṃ ananusociyaṃ ananusocitabbanti.

Evaṃ mahāsatto catūhi gāthāhi aniccākāraṃ dīpento dhammaṃ desesi. Mahājano paribbājikāya sarīrakiccaṃ kāresi. Bodhisatto himavantaṃ pavisitvā jhānābhiññā nibbattetvā brahmalokaparāyano ahosi.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi. Saccapariyosāne kuṭumbiko sotāpattiphale patiṭṭhahi. Tadā sammillahāsinī rāhulamātā ahosi. Tāpaso pana ahamevāti.