Avisahitvā uṭṭhāya rājānaṃ vanditvā gato. So tamatthaṃ attano upaṭṭhākānaṃ ārocetvā ajja tāvamhi ñāto idāni kathaṃ māressāmāti pucchi. Te tato paṭṭhāya uyyāne paṭicchannā hutvā nikaṇṇikavasena mantayamānā attheko upāyoti khaggaṃ sannayhitvā mahāupaṭṭhānagatakāle amaccānaṃ antare ṭhatvā rañño pamādabhāvaṃ ñatvā khaggena paharitvā māretuṃ vaṭṭatīti vavaṭṭhapesuṃ. Kumāro sādhūti sampaṭicchitvā mahāupaṭṭhānakāle sannaddhakhaggo gantvā itocito ca rañño paharaṇokāsaṃ upadhāreti. Tasmiṃ khaṇe rājā dutiyaṃ gāthamāha

yā mantanā araññasmiṃ yā ca gāme nikaṇṇikā

yañcetaṃ iti cintī ca etampi viditaṃ mayāti.

Tattha araññasminti uyyāne. Nikaṇṇikāti kaṇṇamūle sammantanā. Yañcetaṃ iti cintī cāti yañca etaṃ idāni mama paharaṇokāsapariyesanaṃ. Idaṃ vuttaṃ hoti tāta kumāra yā esā tava attano upaṭṭhākehi saddhiṃ uyyāne ca gāme ca nikaṇṇikā mantanā yañcetaṃ idāni mama paharaṇatthāya iti cintīkāraṇaṃ etampi sabbaṃ mayā ñātanti.