Tattha dhammenāti sabhāvena. Puttassa makkaṭoti pitā makkaṭo puttassa makkaṭapotakassa. Idaṃ vuttaṃ hoti yathā araññe jātamakkaṭo attano yūthapariharaṇaṃ āsaṅkanto taruṇasseva makkaṭapotakassa dantehi phalaṃ chinditvā purisabhāvaṃ nāseti tathā tavapi atirajjakāmassa phalādīni uppāṭāpetvā purisabhāvaṃ nāsessāmīti.

Kumāro gaṇhāpetukāmo maṃ pitāti bhīto palāyitvā pitarāmhi santajjitoti upaṭṭhākānaṃ ārocesi. Te aḍḍhamāsamatte vītivatte kumāra sace taṃ rājā jāneyya ettakaṃ kālaṃ nādhivāseyya takkamantena tayā kathitaṃ mārehi nanti vadiṃsu. So ekadivasaṃ khaggaṃ gahetvā uparipāsāde sirisayanaṃ pavisitvā āgacchantameva naṃ paharissāmīti heṭṭhāpallaṅke nipajji. Rājā bhuttasāyamāso parijanaṃ uyyojetvā nipajjissāmīti sirigabbhaṃ pavisitvā ummāre ṭhatvā catutthaṃ gāthamāha

yametaṃ parisappasi ajakāṇova sāsape

yopāyaṃ heṭṭhato seti etampi viditaṃ mayāti.