Atīte bārāṇasiyaṃ (brahmadatte rajjaṃ kārente) bodhisatto (bārāṇasiyaṃ) dhammena samena rajjaṃ kāresi. Nivesane ekā kuntinīsakuṇikā dūteyyahārikā. Sabbaṃ purimasadisameva. Ayaṃ pana viseso. Ayaṃ byagghena dārake mārāpetvā cintesi idāni na sakkā mayā idha vasituṃ gamissāmi gacchantī ca rañño anārocetvāva na gamissāmīti. Sā rājānaṃ upasaṅkamitvā ekamantaṃ ṭhitā sāmi tumhākaṃ pamādena mama puttake dārakā māresuṃ ahaṃ kodhavasikā hutvā te dārake paṭimāresiṃ idāni mayā idha vasituṃ na sakkāti vatvā paṭhamaṃ gāthamāha

avasimhā tavāgāre niccaṃ sakkatapūjitā

tvamevadānimakari handa rāja vajāmahanti.

Tattha tvamevadānimakarīti maṃ paṇṇaṃ gāhāpetvā pesetvā attano pamādena mama piyaputtake arakkhanto tvaññevadāni etaṃ mama gamanakāraṇaṃ akari. Handāti upasaggaṭṭhe nipāto. Rājāti Bodhisattaṃ ālapati. Vajāmahanti himavantaṃ gacchāmīti.