tusitapure vasanteyeva pana bodhisatte buddhakolāhalannāma udapādi. Lokasmiṃ hi tīṇi kolāhalāni uppajjanti kappakolāhalaṃ buddhakolāhalaṃ cakkavattikolāhalanti. Tassa vassasatasahassassa accayena kappuṭṭhānaṃ bhavissatīti lokabyūhā nāma kāmāvacaradevā muttasirā vikiṇṇakesā rudamukhā assūni hatthehi puñchamānā Rattavatthanivatthā ativiya virūpavesadhārino hutvā manussapathe vicarantā evaṃ ārocenti mārisā ito vassasatasahassassa accayena kappuṭṭhānaṃ bhavissati ayaṃ lokopi nassissati mahāsamuddopi nassissati ayañca mahāpaṭhavī sineru ca pabbatarājā uḍḍayhissanti vinassissanti yāva brahmalokā vināso bhavissati mettaṃ mārisā bhāvetha karuṇaṃ muditaṃ upekkhaṃ mārisā bhāvetha mātaraṃ upaṭṭhahatha kulejeṭṭhāpacāyino hothāti. Idaṃ kappakolāhalannāma. Vassasahassassa accayena pana sabbaññubuddho loke uppajjissatīti lokapāladevatā ito mārisā vassasahassassa accayena buddho loke uppajjissatīti ugghosentiyo āhiṇḍanti. Idaṃ buddhakolāhalannāma. Vassasatassa accayena cakkavattirājā uppajjissatīti devatāyeva ito mārisā vassasatassa accayena cakkavattirājā loke uppajjissatīti ugghosentiyo āhiṇḍanti. Idaṃ cakkavattikolāhalannāma. Imāni tīṇi kolāhalāni mahantāni honti. Tesu buddhakolāhalasaddaṃ sutvā sakaladasasahassacakkavāḷadevatā ekato sannipatitvā asuko nāma satto buddho bhavissatīti ñatvā taṃ upasaṅkamitvā āyācanti āyācamānā ca pubbanimittesu uppannesu āyācanti. Tadā pana sabbāpi devatā ekekacakkavāḷe cātummahārājasakkasuyāmasantusita- nimmānaratiparanimmitavasavattimahābrahmehi saddhiṃ ekacakkavāḷe sannipatitvā tusitabhavane bodhisattassa santikaṃ gantvā mārisa tumhehi dasa pāramiyo pūrentehi na sakkasampattiṃ na mārasampattiṃ na Cakkavattisampattiṃ na brahmasampattiṃ paṭṭhentehi pūritā lokanittharaṇatthāya pana sabbaññutaṃ paṭṭhentehi pūritā so vo idāni kālo mārisa buddhattāya samayo mārisa buddhattāyāti yāciṃsu.