Iti imaṃ pañcamahāvilokanaṃ viloketvā kālo me mārisa buddhabhāvāyāti devatānaṃ saṅgahaṃ karonto paṭiññaṃ datvā gacchatha tumheti tā devatā uyyojetvā tusitadevatāhi parivuto tusitapure nandavanaṃ pāvisi. Sabbadevalokesu hi nandavanaṃ atthiyeva. Tatra nandavane devatā ito cuto mārisa sugatiṃ gacchāti pubbekata- kusalakammokāsaṃ sārayamānā vicaranti. So evaṃ devatāhi kusalaṃ sārayamānāhi parivuto tattha vicaranto cavitvā mahāmāyāya deviyā kucchismiṃ paṭisandhiṃ gaṇhi. Yena pana vidhānena gaṇhi tassāvibhāvatthaṃ ayaṃ anupubbikathā.

Tadā kira kapilavatthunagare āsāḷhanakkhattaṃ saṅghuṭṭhaṃ ahosi. Mahājano nakkhattaṃ kīḷati. Mahāmāyāpi devī pure puṇṇamāya sattamadivasato paṭṭhāya vigatasurāpānaṃ mālāgandhavibhūsanasampannaṃ nakkhattakīḷaṃ anubhavamānā sattamadivase pātova uṭṭhāya gandhodakena nhāyitvā cattāri satasahassāni vissajjetvā mahādānaṃ datvā sabbālaṅkāravibhūsitā varabhojanaṃ bhuñjitvā uposathaṅgāni adhiṭṭhāya alaṅkatapaṭiyattaṃ sirigabbhaṃ pavisitvā sirisayane nipannā niddaṃ okkamamānā imaṃ supinaṃ addasa cattāro kira naṃ mahārājāno sayaneneva saddhiṃ ukkhipitvā himavantaṃ pavisitvā saṭṭhiyojanike silātale sattayojanikassa mahāsālarukkhassa heṭṭhā ṭhapetvā ekamantaṃ aṭṭhaṃsu. Atha nesaṃ Deviyo āgantvā deviṃ anotattadahaṃ netvā manussamalaharaṇatthaṃ nhāpetvā dibbavatthaṃ nivāsāpetvā dibbagandhehi vilimpāpetvā dibbapupphāni pilandhāpetvā tato avidūre eko rajatapabbato tassa anto kanakavimānaṃ atthi tattha pācīnato uccaīsakaṃ dibbasayanaṃ paññāpetvā nisajjāpesuṃ. Atha bodhisatto setavaravāraṇo hutvā tato avidūre eko suvaṇṇapabbato tattha vicaritvā tato oruyha rajatapabbataṃ āruhitvā uttaradisato āgamma rajatadāmavaṇṇāya soṇḍāya setapadumaṃ gahetvā koñcanādaṃ naditvā kanakavimānaṃ pavisitvā mātusayanaṃ tikkhattuṃ padakkhiṇaṃ katvā dakkhiṇapassaṃ padāletvā kucchippaviṭṭhasadiso ahosi. Evaṃ uttarāsāḷhanakkhatte paṭisandhiṃ gaṇhi.