Punadivase pabuddhā devī taṃ supinaṃ rañño ārocesi. Rājā catusaṭṭhimatte brāhmaṇapāmokkhe pakkosāpetvā gomayaharitupalittāya lājādīhi katamaṅgalasakkārāya bhūmiyā mahārahāni āsanāni paññāpetvā tattha nisinnānaṃ brāhmaṇānaṃ sappimadhusakkarābhisaṅkhatassa varapāyāsassa suvaṇṇarajatapātiyo pūretvā suvaṇṇarajatapātīhi paṭikujjitvā adāsi aññehi ca ahatavatthakapilagāvīdānādīhi saddhiṃ te santappesi atha tesaṃ sabbakāmasantappitānaṃ supinaṃ ārocetvā kiṃ bhavissatīti pucchi. Brāhmaṇā āhaṃsu mā cintayittha mahārāja deviyā te kucchimhi gabbho patiṭṭhito so ca kho purisagabbho patiṭṭhito na itthīgabbho putto te bhavissati So sace agāraṃ ajjhāvasissati rājā bhavissati cakkavatti sace agārā nikkhamma pabbajissati buddho bhavissati loke vivaṭacchadoti.
Bodhisattassa pana mātukucchimhi paṭisandhigahaṇakkhaṇeyeva ekappahāreneva sakaladasasahassī lokadhātu saṅkampi sampakampi sampavedhi. Dvattiṃsa pubbanimittāni pāturahesuṃ. Dasasu cakkavāḷasahassesu appamāṇo obhāso phari. Tassa taṃ siriṃ daṭṭhukāmā viya andhā cakkhūni paṭilabhiṃsu. Badhirā saddaṃ suṇiṃsu. Mūgā sammālapiṃsu. Khujjā ujugattā ahesuṃ. Paṅgulā padasā gamanaṃ paṭilabhiṃsu. Bandhanagatā sabbasattā andubandhanādīhi mucciṃsu. Sabbanarakesu aggi nibbāyi. Pittivisaye khuppipāsā vūpasamiṃsu. Tiracchānagatānaṃ bhayaṃ nāhosi. Sabbasattānaṃ rogo ceva rāgādikilesaggi ca vūpasamiṃsu. Sabbasattā piyavācā ahesuṃ. Madhurenākārena assā hasiṃsu vāraṇā gajjiṃsu. Sabbaturiyāni sakasakaninnādaṃ muñciṃsu aghaṭṭitāniyeva. Manussānaṃ hatthūpagāni ābharaṇāni viraviṃsu. Sabbā disā vippasannā ahesuṃ. Sattānaṃ sukhaṃ uppādayamāno mudu sītalo vāto pavāyi. Akālamegho pavassi. Paṭhavitopi udakaṃ ubbhijjitvāpi sandati. Pakkhino ākāsagamanaṃpi vijahiṃsu. Nadiyo asandamānā aṭṭhaṃsu. Mahāsamudde madhuraṃ udakaṃ ahosi. Sabbatthakameva pañcavaṇṇehi padumehi sañchannaṃ talaṃ ahosi. Thalajajalajādīni sabbapupphāni pupphiṃsu. Rukkhānaṃ khandhesu khandhapadumāni sākhāsu sākhapadumāni latāsu latāpadumāni pupphiṃsu. Thale silātalāni bhinditvā uparupari satta satta hutvā Daṇḍapadumāni nāma nikkhamiṃsu. Ākāse olambitapadumāni nibbattiṃsu. Samantato pupphavassaṃ vassi. Ākāse dibbaturiyāni vajjiṃsu. Sakaladasasahassī lokadhātu vaṭṭetvā vissaṭṭhamālāguḷaṃ viya uppīḷetvā bandhamālākalāpo viya alaṅkatapaṭiyattamālāsayanaṃ viya ca ekamālāmālinī vipphurantavālavījanī pupphadhūpagandhaparivāsitā paramasobhaggappattā ahosi.