yamhi ghātayiṃ khattiyānaṃ sahasse

alaṅkate candanasāralitte

tameva dukkhaṃ paccāgataṃ mamanti.

Tattha idaṃ tadācariyavacoti idantaṃ ācariyassa vacanaṃ. Pārācariyoti taṃ gottena kitteti. Pacchā katanti yaṃ pāpaṃ tayā kataṃ pacchā taṃ tāpeyya kilameyya taṃ mā karīti ovādaṃ adāsi ahaṃ panassa vacanaṃ na karinti. Ayamevāti nigrodharukkhaṃ dassento vilapati. Venasākhoti patthaṭasākho. Yamhi ca ghātayinti yamhi rukkhe khattiyasahasse māresuṃ. Alaṅkate candanasāralitteti rājālaṅkārehi alaṅkate lohitacandanasārānulitte te khattiye yatthāhaṃ ghātesiṃ ayameva so rukkho idāni mayhaṃ kiñci parittāṇaṃ kātuṃ na sakkotīti dīpeti. Tameva dukkhanti yaṃ mayā paresaṃ akkhiuppāṭanadukkhaṃ kataṃ idaṃ me tatheva paṭiāgataṃ. Idāni no ācariyassa vacanaṃ matthakaṃ pattanti paridevati.