Evaṃ gahitapaṭisandhikassa bodhisattassa paṭisandhito paṭṭhāya bodhisattassa ceva bodhisattassa mātuyā ca upaddavanivāraṇatthaṃ khaggahatthā cattāro devaputtā ārakkhaṃ gaṇhiṃsu. Bodhisattamātuyā purisesu rāgacittaṃ nuppajji. Lābhaggayasaggappattā ca ahosi sukhinī akilantakāyā bodhisattañca antokucchigataṃ vippasanne maṇiratane āvutapaṇḍarasuttaṃ viya passati. Yasmā bodhisattena vasitakucchi nāma cetiyagabbhasadisā na sakkā hoti aññena sattena āvasituṃ vā paribhuñjituṃ vā tasmā bodhisattamātā sattāhajāte bodhisatte kālaṃ katvā tusitapure nibbatti. Yathā ca aññā itthiyo dasamāse appatvāpi atikkamitvāpi nisinnāpi nipannāpi vijāyanti na evaṃ bodhisattamātā. Sā pana bodhisattaṃ dasamāse kucchiyā pariharitvā ṭhitā ca vijāyati. Ayañcesā bodhisattamātu dhammatā. Mahāmāyāpi devī pattena telaṃ viya dasamāse kucchiyā bodhisattaṃ pariharitvā paripuṇṇagabbhā ñātigharaṃ gantukāmā suddhodanamahārājassa ārocesi icchāmahaṃ deva kulasantakaṃ devadahanagaraṃ Gantunti. Rājā sādhūti sampaṭicchitvā kapilavatthuto yāva devadahanagarā maggaṃ samaṃ kāretvā kaddalipuṇṇaghaṭadhajapaṭākāhi alaṅkārāpetvā deviṃ suvaṇṇasīvikāya nisīdāpetvā amaccasahassena ukkhipāpetvā mahantena parivārena pesesi. Dvinnaṃ pana nagarānaṃ antare ubhayanagaravāsīnaṃpi lumbinivanaṃ nāma maṅgalasālavanaṃ atthi. Tasmiṃ samaye mūlato yāva aggasākhā sabbaṃ ekaphāliphullaṃ ahosi. Sākhantarehi ceva pupphantarehi ca pañcavaṇṇā bhamaravaṇṇā nānappakārā ca sakuṇasaṅghā madhurassarena vikūjantā vicaranti. Sakalaṃ lumbinivanaṃ cittalatāvanasadisaṃ mahānubhāvassa rañño susajjitaṃ āpānatalamaṇḍalaṃ viya hoti. Deviyā taṃ disvā sālavanakīḷaṃ kīḷitukāmatā udapādi. Amaccā deviṃ gahetvā sālavanaṃ pavisiṃsu. Sā maṅgalasālamūlaṃ gantvā sālasākhāyaṃ gaṇhitukāmā ahosi. Sālasākhā suseditavettaggaṃ viya onamitvā deviyā hatthapathaṃ upagacchi. Sā hatthaṃ pasāretvā sākhaṃ aggahesi.