Tattha anabbhitoti ayaṃ tāta mayā paralokato anabbhitova ayācitova. Āgāti amhākaṃ gehaṃ āgato. Itoti ito manussalokato gacchantopi mayā ananuññātova gato. Yathāgatoti āgacchantopi yathā attanova ruciyā āgato gacchantopi tatheva gato. Tatthāti tasmiṃ tassa ito gamane kā paridevanā. Dayhamānoti gāthā vuttanayeneva veditabbā.

Atha sakko brāhmaṇiyā kathaṃ sutvā bhaginiṃ pucchi amma tuyhaṃ so kiṃ hotīti. Bhātā me sāmīti. Amma bhaginiyo nāma bhātūsu sasinehā honti tvaṃ kasmā na rodasīti. Sāpissa arodanakāraṇaṃ kathentī

sace rode kīsā assaṃ tassā me kiṃ phalaṃ siyā

ñātimittāsuhajjānaṃ bhiyyo no aratī siyā