dayhamāno na jānāti ñātīnaṃ paridevataṃ

tasmā etaṃ na socāmi gato so tassa yā gatīti gāthādvayamāha.

Tattha saceti yadi ahaṃ bhātari mate rodeyyaṃ kīsasarīrā assaṃ bhātu pana me tappaccayā vuḍḍhi nāma natthīti dasseti. Tassā meti tassā mayhaṃ rodantiyā kiṃ phalaṃ ko ānisaṃso bhaveyya avuḍḍhi pana paññāyatīti dīpeti. Ñātimittāsuhajjānanti ñātimittasuhajjānaṃ. Ayameva vā pāṭho. Bhiyyo noti ye amhākaṃ ñātī ca mittā ca suhajjā ca tesaṃ Adhikatarā arati siyā.

Atha sakko bhaginiyā kathaṃ sutvā tassa bhariyaṃ pucchi amma tuyhaṃ so kiṃ hotīti. Pati me sāmīti. Itthiyo nāma patimhi mate vidhavā honti anāthā tvaṃ kasmā na rodasīti. Sāpissa arodanakāraṇaṃ kathentī