Tāvadeva cassā kammajavātā caliṃsu. Athassā sāṇiyā parikkhipitvā mahājano paṭikkami. Sālasākhaṃ gahetvā tiṭṭhamānāyaeva cassā gabbhavuṭṭhānaṃ ahosi. Taṃ khaṇaṃyeva cattāro visuddhacittā mahābrahmāno suvaṇṇajālaṃ ādāya sampattā tena suvaṇṇajālena bodhisattaṃ sampaṭicchitvā mātu purato ṭhapetvā attamanā devi hohi mahesakkho te putto uppannoti āhaṃsu. Yathā pana aññe sattā mātukucchito nikkhamantā paṭikkūlena asucinā makkhitā Nikkhamanti na evaṃ bodhisatto. So pana dhammāsanato otaranto dhammakathiko viya nisseṇito otaranto puriso viya dve hatthe ca pāde ca pasāretvā ṭhitakova mātukucchisambhavena kenaci asucinā amakkhito suddho visuddho kāsikavatthe nikkhittamaṇiratanaṃ viya jotayanto mātukucchito nikkhami. Evaṃ santepi bodhisattassa ca bodhisattamātuyā ca sakkāratthaṃ ākāsato dve udakadhārā nikkhamitvā bodhisattassa ca mātuyā ca sarīre utuṃ gāhāpesuṃ. Atha naṃ suvaṇṇajālena paṭiggahetvā ṭhitānaṃ brahmānaṃ hatthato cattāro mahārājāno maṅgalasammatāya sukhasamphassāya ajinappaveṇiyā gaṇhiṃsu. Tesaṃ hatthato manussā dukūlacumbaṭakena paṭiggaṇhiṃsu. Manussānaṃ hatthato muccitvā paṭhaviyaṃ patiṭṭhāya puratthimadisaṃ olokesi. Anekāni cakkavāḷasahassāni ekaṅgaṇāni ahesuṃ. Tattha devamanussā gandhamālādīhi pūjayamānā mahāpurisa idha tumhehi sadiso añño natthi kuto uttaritaroti āhaṃsu. Evaṃ catasso disā anudisā heṭṭhā uparīti dasapi disā vidisā anuviloketvā attanā sadisaṃ adisvā ayaṃ uttaradisāti sattapadavītihārena agamāsi mahābrahmunā setacchattaṃ dhārayamānena suyāmena devaputtena vālavījaniṃ aññāhi ca devatāhi sesarājakakudhabhaṇḍahatthāhi anugammamāno tato sattamapade ṭhito aggohamasmi lokassāti ādikaṃ āsabhivācaṃ nicchārento sīhanādaṃ nadi.
Bodhisatto hi tīsu attabhāvesu mātukucchito nikkhantamattova Vācaṃ nicchāresi mahosadhattabhāve vessantarattabhāve imasmiṃ attabhāveti. Mahosadhattabhāve kirassa mātukucchito nikkhamantasseva sakko devarājā āgantvā candanasāraṃ hatthe ṭhapetvā gato. So taṃ muṭṭhiyaṃ katvā nikkhamanto. Atha naṃ mātā tāta kiṃ gahetvā āgatosīti pucchi. Osadhaṃ ammāti. Iti osadhaṃ gahetvā āgatattā osadhadārakotvevassa nāmaṃ akaṃsu. Taṃ osadhaṃ gahetvā cāṭiyaṃ pakkhipiṃsu. Āgatāgatānaṃ andhabadhirādīnaṃ tadeva sabbarogavūpasamāya bhesajjaṃ ahosi. Tato mahantaṃ idaṃ osadhaṃ mahantaṃ idaṃ osathanti uppannavacanaṃ upādāya mahosadhotvevassa nāmaṃ jātaṃ. Vessantarattabhāve pana mātukucchito nikkhantamatto dakkhiṇahatthaṃ pasāretvāva atthi nu kho amma kiñci dhanaṃ gehasmiṃ dānaṃ dassāmīti vadanto nikkhami. Athassa mātā sadhane kule nibbattosi tātāti puttassa hatthaṃ attano hatthatale katvā sahassatthavikaṃ ṭhapāpesi. Imasmiṃ attabhāve imaṃpi sīhanādaṃ nadīti.