culladhammapālajātakaṃ

ahameva dūsiyā bhūnahatāti idaṃ satthā veḷuvane viharanto devadattassa vadhāya parisakkanaṃ ārabbha kathesi.

Aññesu jātakesu devadatto bodhisattassa tāsamattampi kātuṃ nāsakkhi. Imasmiṃ pana culladhammapālajātake bodhisattassa sattamāsikakāle hatthapāde ca sīsañca chindāpetvā asimālakaṃ nāma kāresi. Daddarajātake gīvaṃ vattetvā māretvā uddhane maṃsaṃ pacitvā khādi.

Khantivādijātake dvīhipi kasāhi pahārasahassehi tāḷāpetvā hatthapāde ca kaṇṇanāsañca chindāpetvā jaṭāsu gahetvā kaḍḍhāpetvā uttānakaṃ nipajjāpetvā ure pādena paharitvā gato. Bodhisatto taṃdivasaññeva jīvitakkhayaṃ pāpuṇi. Cullanandikajātakepi mahākapijātakepi mārāpesiyeva. Evamevesa dīgharattaṃ vadhāya parisakkanto buddhakāle parisakkatiyeva. Athekadivasaṃ bhikkhū dhammasabhāyaṃ kathaṃ samuṭṭhāpesuṃ āvuso devadatto buddhānaṃ māraṇatthameva upāyaṃ karoti sammāsambuddhaṃ mārāpessāmīti dhanuggahaṃ payojesi silaṃ pavijjhi nāḷāgiriṃ visajjāpesīti. Satthā āgantvā kāyanuttha bhikkhave etarahi kathāya sannisinnāti pucchitvā imāya nāmāti vutte na bhikkhave idāneva pubbepesa mayhaṃ vadhāya parisakkateva idāni pana tāsamattampi kātuṃ na sakkoti pubbe maṃ dhammapālakumārakāle attano puttaṃ samānaṃ jīvitakkhayaṃ pāpetvā asimālakaṃ nāma kāresīti vatvā atītaṃ āhari.