chaḷaṅgavā manta byākariṃsūti Ime aṭṭha brāhmaṇā lakkhaṇapaṭiggāhakā ahesuṃ. Paṭisandhigahaṇadivase supinopi eteheva paṭiggahito. Tesu satta janā dve aṅguliyo ukkhipitvā dvedhā byākariṃsu imehi lakkhaṇehi samannāgato agāraṃ ajjhāvasamāno rājā hoti cakkavatti pabbajamāno buddhoti sabbaṃ cakkavattiraññe sirivibhavaṃ ācikkhiṃsu. Tesaṃ pana sabbadaharo gottena koṇḍañño nāma māṇavo bodhisattassa lakkhaṇānaṃ nipphattiṃ oloketvā etassa agāramajjhe ṭhānakāraṇaṃ natthi ekanteneva vivaṭacchado buddho bhavissatīti ekameva aṅguliṃ ukkhipitvā ekaṃ byākaraṇaṃ akāsi. Ayaṃ hi katādhikāro pacchimabhavikasatto paññāya itare satta jane abhibhavitvā imehi lakkhaṇehi samannāgatassa agāramajjhe ṭhānaṃ nāma natthi asaṃsayaṃ buddho bhavissatīti ekameva gatiṃ addasa tasmā ekaṃ aṅguliṃ ukkhipitvā ekaṃ byākāsi. Atha te brāhmaṇā attano gharāni gantvā putte āmantayiṃsu tātā amhe mahallakā suddhodanamahārājassa puttaṃ sabbaññutappattaṃ mayaṃ labheyyāma vā no vā tumhe tasmiṃ kumāre sabbaññutaṃ sampatte tassa sāsane pabbajeyyāthāti. Te sattapi janā yāvatāyukaṃ ṭhatvā yathākammaṃ gatā. Koṇḍaññamāṇavo arogo ahosi. So mahāsatte vuḍḍhimanvāya mahābhinikkhamanaṃ abhinikkhamitvā anukkamena uruvelaṃ gantvā ramaṇīyo vata ayaṃ bhūmibhāgo alaṃ vatidaṃ kulaputtassa padhānatthikassa padhānāyāti cittaṃ uppādetvā tattha vāsaṃ upagate Mahāpuriso pabbajitoti sutvā tesaṃ brāhmaṇānaṃ putte upasaṅkamitvā evamāha siddhatthakumāro kira pabbajito so nissaṃsayaṃ buddho bhavissati sace tumhākaṃ pitaro arogā assuṃ ajja nikkhamitvā pabbajeyyuṃ sace tumhe taṃpi iccheyyātha etha ahaṃ taṃ mahāpurisaṃ anupabbajissāmīti. Te sabbe ekacchandā bhavituṃ nāsakkhiṃsu. Tayo janā pabbajiṃsu. Koṇḍaññabrāhmaṇaṃ jeṭṭhakaṃ katvā itare cattāro pabbajiṃsu. Te pañcajanā pañcavaggiyattherā nāma jātā.
Tadā pana rājā kiṃ disvā mayhaṃ putto pabbajissatīti pucchi. Cattāri pubbanimittānīti. Katarañca katarañcāti. Jarājiṇṇaṃ byādhitaṃ mataṃ pabbajitanti. Rājā ito paṭṭhāya evarūpānaṃ mama puttassa santikaṃ upasaṅkamituṃ mā adattha mayhaṃ puttassa buddhabhāvena kammaṃ natthi ahaṃ mama puttaṃ dvisahassaparittadīpaparivārānaṃ catunnaṃ mahādīpānaṃ issariyādhipaccaṃ rajjaṃ kārentaṃ chattiṃsayojanaparimaṇḍalāya parisāya parivutaṃ gaganatale vicaramānaṃ passitukāmomhīti. Evañca pana vatvā imesaṃ catuppakārānaṃ parisānaṃ kumārassa cakkhupathe āgamananivāraṇatthaṃ catūsu disāsu gāvute gāvute ārakkhaṃ ṭhapesi. Taṃ divasañca pana maṅgalaṭṭhāne sannipatitesu asītiyā ñātikulasahassesu ekamekova ekamekaṃ puttaṃ paṭijāniṃsu ayaṃ buddho vā hotu rājā vā mayaṃ ekamekaṃ puttaṃ dassāma sacepi buddho bhavissati khattiyasamaṇeheva purakkhitaparivārito vicarissati sacepi Rājā bhavissati khattiyakumāreheva purakkhitaparivārito vicarissatīti. Rājāpi bodhisattassa uttamarūpadharā vigatasabbadosā dhātiyo paccupaṭṭhapesi. Bodhisatto anantena parivārena mahantena sirisobhaggena vaḍḍhati.