Tattha vikkamāmīti bhadde te ahaṃ viriyaṃ karomi. Na pādemīti pāsaṃ pana chindituṃ na sakkomīti attho. Bhūmiṃ sumbhāmīti api nāma chijjeyyāti pādena pāse bhūmiṃ paharāmi. Vegasāti vegena. Parikantatīti cammādīni chindanto samantā kantati.
Atha naṃ migī mā bhāyi sāmi ahaṃ attano balena luddakaṃ yācitvā tava jīvitaṃ āharissāmi sace yācamānā sakkhissāmi mama jīvitampi datvā tava jīvitaṃ āharissāmīti mahāsattaṃ assāsetvā lohitalittaṃ bodhisattaṃ pariggahetvā aṭṭhāsi. Luddakopi asiñca sattiñca gahetvāva kappuṭṭhānaggi viya āgacchati. Sā taṃ disvā sāmi migaluddako āgacchati ahaṃ attano balaṃ karissāmi tvaṃ mā bhāyīti taṃ assāsetvā luddakassa paṭipathaṃ gantvā paṭikkamitvā ekamantaṃ ṭhitā taṃ vanditvā sāmi mama sāmiko suvaṇṇavaṇṇo sīlācārasampanno asītisahassānaṃ migānaṃ rājāti bodhisattassa guṇaṃ kathetvā migarāje ṭhiteyeva attano vadhaṃ yācantī tatiyaṃ gāthamāha
attharassu palāsāni asiṃ nibbāha luddaka